استنبول: ترکیہ کی 27 سالہ معروف فیشن انفلوئنسر عائشہ گل ایراسلان کی اچانک اور پراسرار موت نے مداحوں کو صدمے میں مبتلا کر دیا، جبکہ حکام نے واقعے کی تحقیقات شروع کر دی ہیں۔
پولیس کے مطابق عائشہ گل کو استنبول کے علاقے کاغیتھانے میں واقع ان کی رہائش گاہ سے بے ہوشی کی حالت میں پایا گیا۔ اہلخانہ نے رابطہ نہ ہونے پر حکام کو اطلاع دی، جس پر ریسکیو ٹیمیں موقع پر پہنچیں اور ان کی موت کی تصدیق کی گئی۔
واقعے کے بعد پولیس اور پراسیکیوٹر نے جائے وقوعہ کا معائنہ کیا جبکہ لاش کو فرانزک تجزیے کے لیے منتقل کر دیا گیا ہے تاکہ موت کی اصل وجہ معلوم کی جا سکے۔
تحقیقات کے دوران عمارت کی سکیورٹی فوٹیج بھی سامنے آئی ہے، جس میں ایک شخص کو ان کے گھر میں داخل ہوتے اور کچھ دیر بعد باہر نکلتے دیکھا گیا۔ پولیس نے مذکورہ شخص سے پوچھ گچھ کی تاہم بیان ریکارڈ کرنے کے بعد اسے رہا کر دیا گیا، جبکہ اس کے وکلا نے مؤقف اختیار کیا کہ وہ واقعے کے وقت موقع پر موجود نہیں تھا۔
حکام کا کہنا ہے کہ تاحال کسی قسم کی بدفعلی کی تصدیق نہیں ہوئی، تاہم کیس کو مشکوک قرار دے کر تحقیقات جاری رکھی گئی ہیں۔ ابتدائی اطلاعات کے مطابق عائشہ گل حال ہی میں بیرون ملک سفر سے واپس آئی تھیں۔
عائشہ گل ایراسلان سوشل میڈیا پر ایک معروف فیشن انفلوئنسر تھیں اور ان کے لاکھوں فالوورز تھے، جبکہ وہ ترک فیشن شوز میں بھی حصہ لے چکی تھیں۔
دیکھئیے:کنگنا رناوت کی نورا فتحی کے گانے پر تنقید، گانے کو فحاشی کی انتہا قرار دے دیا