امریکی وزیرِ خزانہ اسکاٹ بیسنٹ نے کہا ہے کہ امریکا ایران پر ایسی پابندیاں عائد کرے گا جو تاریخ میں پہلے کبھی نہیں دیکھی گئیں، اس حوالے سے مزید اعلانات آئندہ ہفتے متوقع ہیں۔
امریکی میڈیا کو انٹرویو دیتے ہوئے اسکاٹ بیسنٹ کا کہنا تھا کہ اگلے ہفتے مزید اعلانات کے لیے تیار رہیں، کیونکہ ایران کو معاشی طور پر تنہا کرنے کے لیے ایسے اقدامات کیے جا رہے ہیں جو اس سے پہلے تاریخ میں کبھی نہیں دیکھے گئے۔
امریکی وزیرِ خزانہ کے مطابق ان اقدامات میں تہران پر معاشی دباؤ بڑھانے کے ساتھ ساتھ آبنائے ہرمز سے متعلق پابندیاں بھی شامل ہوں گی۔ ان کا کہنا تھا کہ یہ ایسی معاشی تنہائی کا امتزاج ہوگا جس کی دنیا نے پہلے کبھی مثال نہیں دیکھی، اور آبنائے ہرمز میں جاری ناکہ بندی بھی برقرار رہے گی جس کے باعث ایرانی بندرگاہوں سے نہ کچھ اندر آ سکے گا اور نہ باہر جا سکے گا۔
خیال رہے کہ اس سے قبل امریکی صدر ڈونلڈ ٹرمپ بھی کہہ چکے ہیں کہ ایران کے پاس اپنے فوجیوں کو تنخواہیں دینے کے لیے رقم نہیں ہے۔
دیکھیے: جب تک مطالبات پورے نہیں ہوتے، آبنائے ہرمز بند رہے گی: ایران