امریکی صدر ڈونلڈ ٹرمپ دو روزہ سرکاری دورے پر بیجنگ پہنچ گئے؛ ایران جنگ کا خاتمہ اور معاشی تعاون ایجنڈے میں سرِ فہرست

امریکی صدر ڈونلڈ ٹرمپ اپنے دو روزہ سرکاری دورے پر چین کے دارالحکومت بیجنگ پہنچ چکے ہیں۔ بیجنگ پہنچنے پر چینی نائب صدر ہان ژینگ نے امریکی صدر کا پرتپاک استقبال کیا۔ اس موقع پر دونوں ممالک کے سفیر اور چین کے ایگزیکٹو نائب وزیر خارجہ ما ژاؤشو بھی وہاں موجود تھے۔ صدر ٹرمپ کے استقبال کے لیے 300 کے قریب چینی نوجوان بھی موجود تھے جنہوں نے دونوں ممالک کے پرچم اٹھا رکھے تھے۔

صدر ٹرمپ کے ہمراہ اس دورے میں ان کے بیٹے ایرک ٹرمپ اور بہو لارا ٹرمپ کے علاوہ ایلون مسک بھی شامل ہیں۔ اپنے اس اہم دورے کے دوران امریکی صدر چینی صدر شی جن پنگ سے ملاقات کریں گے۔ روانگی سے قبل میڈیا سے گفتگو میں صدر ٹرمپ نے بتایا کہ وہ چینی صدر سے ایران جنگ پر تفصیلی بات کریں گے۔ اس کے علاوہ وہ چین کو امریکی منڈیوں کے لیے مزید کھولنے کا مطالبہ بھی کریں گے۔

چیئرمین پاک چائنہ انسٹیٹیوٹ مشاہد حسین سید نے اس دورے کو انتہائی اہمیت کا حامل قرار دیا ہے۔ ان کا کہنا ہے کہ امریکی صدر ایران جنگ سے جان چھڑانا چاہتے ہیں جبکہ چین اور پاکستان بھی جنگ کے خاتمے کے حامی ہیں۔ مشاہد حسین نے امید ظاہر کی کہ اس دورے کے بعد ایران امریکہ جنگ سے متعلق مثبت پیشرفت ہوگی۔ انہوں نے مزید کہا کہ امریکہ اس وقت معاشی مشکلات اور جنگوں میں پھنسا ہوا ہے جبکہ چین کی بنیادی سوچ اقتصادی ترقی ہے۔

دیکھئیے:چین کا پاکستان سے ایران۔ امریکہ ثالثی تیز کرنے کا مطالبہ، آبنائے ہرمز کی بحالی اور علاقائی امن پر زور