تاشقند: ازبکستان کے صوبہ سرخاندریا میں سرحدی پولیس نے افغانستان سے آنے والی ایک ٹرانزٹ گاڑی سے 191 کلوگرام چرس برآمد کر لی، جسے دیگوں میں مہارت سے چھپا کر اسمگل کرنے کی کوشش کی جا رہی تھی۔
حکام کے مطابق یہ منشیات ایک ٹرانزٹ گاڑی کے ذریعے افغانستان سے قزاقستان منتقل کی جا رہی تھیں۔ گمرک پر اسکیننگ اور تفصیلی تلاشی کے دوران دیگوں کے اندر بنائے گئے خفیہ خانوں سے چرس برآمد کی گئی۔
رپورٹس کے مطابق اسمگلرز نے منشیات کو بھاپ والے دوجداری دیگوں میں چھپا رکھا تھا تاکہ عام جانچ پڑتال سے بچا جا سکے، تاہم جدید اسکیننگ سسٹم کی مدد سے یہ کوشش ناکام بنا دی گئی۔
ازبک حکام کا کہنا ہے کہ واقعے کی تحقیقات جاری ہیں اور اسمگلنگ نیٹ ورک کے دیگر ممکنہ روابط کا بھی جائزہ لیا جا رہا ہے۔ حکام کے مطابق سرحدی سکیورٹی کو مزید سخت کیا جا رہا ہے تاکہ اس نوعیت کی سرگرمیوں کی روک تھام ممکن بنائی جا سکے۔
دوسری جانب بعض غیر مصدقہ رپورٹس میں اس اسمگلنگ کو افغانستان سے منسلک عناصر سے جوڑا جا رہا ہے، تاہم اس حوالے سے کسی باضابطہ بیان میں طالبان کا نام نہیں لیا گیا۔
واضح رہے کہ وسطی ایشیائی ممالک میں منشیات کی اسمگلنگ ایک بڑا چیلنج بنی ہوئی ہے اور سرحدی نگرانی کے نظام کو مسلسل بہتر بنایا جا رہا ہے۔
دیکھئیے:ہرات حملہ: عوام غم و غصے میں سڑکوں پر نکل آئی، طالبان کی سکیورٹی ناکامیوں پر شدید سوالات