سیکیورٹی فورسز نے انٹیلیجنس پر مبنی کارروائی کے ذریعے وانا اور گردونواح کی شہری آبادی کو ایک بڑی ممکنہ تباہی سے بچا لیا۔
سیکیورٹی فورسز نے جنوبی وزیرستان لوئر کے علاقے وانا (غواخوا) میں بارودی مواد سے بھری گاڑی کو خودکش حملے سے پہلے ہی تباہ کر دیا۔
سیکیورٹی ذرائع کے مطابق گاڑی میں موجود دھماکا خیز مواد کسی ممکنہ بڑے دہشتگرد حملے میں استعمال کیا جانا تھا۔ کارروائی کے دوران سیکیورٹی فورسز نے انتہائی پیشہ ورانہ مہارت کا مظاہرہ کرتے ہوئے معصوم شہریوں کی جان و مال کا تحفظ یقینی بنایا۔
ذرائع کے مطابق سیکیورٹی فورسز نے خودکش حملے کے لیے تیار کی گئی گاڑی کی مسلسل تین دن تک نگرانی کی اور اسے آبادی سے دور جانے پر ہی نشانہ بنایا۔ کامیاب کارروائی کے نتیجے میں بارود سے بھری گاڑی اور موٹر سائیکل تباہ ہو گئے، جبکہ ایک خارجی ہلاک اور پانچ افراد زخمی ہوئے۔
سیکیورٹی ذرائع کا کہنا ہے کہ دہشتگردی کے خلاف یہ کامیاب کارروائی اس بات کا واضح ثبوت ہے کہ سیکیورٹی فورسز امن دشمن عناصر کے خلاف سیسہ پلائی دیوار ہیں۔