اسلام آباد | 26 جون 2025 ایران اور پاکستان کے درمیان بھائی چارے اور تعاون پر مبنی رشتے نے ایک نئی تاریخ رقم کی جب ایران نے اپنے خلاف ظلم پر مبنی جارحیت کے خلاف ایک عظیم فتح حاصل کی، اس موقع پر اسلامی جمہوریہ ایران نے پاکستان کی پرخلوص حمایت کا خصوصی شکریہ ادا کیا کہ تنازعے کے دوران لمحہ بہ لمحہ ایران کے ساتھ کھڑا رہا۔ یہ اتحاد دونوں ممالک کے درمیان گہرے تعلقات کی علامت ہے۔
پاکستان کا مؤقف
تیرہ جون کو کشیدگی کے ابتداء سے ہی پاکستان نے ایران کے ساتھ اپنی اصولی حمایت کا اظہار کیا۔ صدر آصف علی زرداری، وزیراعظم میاں محمد شہباز شریف، آرمی چیف جنرل عاصم منیر، نائب وزیراعظم اسحاق ڈار اور وزیر دفاع خواجہ آصف سمیت قومی رہنماؤں نے بڑے جرّی انداز میں ایران کے حق میں صدا بلند کی۔ پارلیمنٹ کے اراکین، مذہبی رہنماؤں، سیاسی جماعتوں اور میڈیا نے بھی ایران کے ساتھ اظہارِ یکجہتی کا اعلان کیا۔
اس کے علاوہ پاکستان کے وزارت خارجہ نے اقوام متحدہ، سلامتی کونسل اور تنظیم تعاون اسلامی جیسے فورمز پر ایران کے موقف کی بہتر انداز سے وکالت کی۔ جس نے عالمی سطح پر ایران کے دفاعی وجوہری حق کو تسلیم کرنے میں مؤثر کردار ادا کیا۔
چیئرمین سینیٹ اور ایرانی سفیر
اسلام آباد میں پارلیمنٹ ہاؤس کے ایک اعلیٰ سطحی اجلاس میں سینیٹ چیئرمین سید یوسف رضا گیلانی نے ایران کے سفیر ڈاکٹر رضا امیری مغلدام کو خوش آمدید کہا۔ دونوں رہنماؤں نے خطے کی صورتحال اور مشرق وسطیٰ میں امن کے قیام کی ضرورت پر تفصیلی تبادلہ خیال کیا۔ یوسف رضاگیلانی نے پاکستان اور ایران کے بھائی چارے اور اتحاد کا ذکر کرتے ہوئے ایران کی قیادت، مسلح افواج اور عوام کو زبردست انداز میں خراج تحسین پیش کیا۔
انہوں نے ایران کے اعلیٰ فوجی افسران، جوہری سائنسدانوں اور معصوم شہریوں کی شہادت پر گہرے رنج و غم کا اظہار کیا اور اسرائیلی جارحیت کی پرزور مذمت کی۔یوسف رضا گیلانی نے زور دے کر کہا کہ پاکستان خطے میں استحکام کے لیے عالمی رہنماؤں کے ساتھ سفارت کاری اقدامات کرتا رہےگا۔
مثالی اتحاد
ایران کی عوام پاکستان کے اصولی اور جرات پر مبنی موقف کو ہمیشہ یاد رکھےگی۔ جو اسلامی اتحاد اور بھائی چارے کی عظیم مثال ہے۔ اس فتح نے امت مسلمہ کےسر فخرسےند کر دیئے ہیں۔
ایران اور پاکستان کے درمیان مذکورہ فتح اور جنگ بندی دونوں ممالک کےتعلقات کو مزید گہرا کرےگی۔ یہ اتحاد نہ صرف موجودہ نسل کے لیے بلکہ آنے والی نسلوں کے لیے بھی ایک مثال بن کر رہےگا۔ جو دونوں ممالک کے درمیان سفارتی تعلقات کو نئی بلندیوں تک لے جائے گا۔