افغانستان کے صوبہ کنڑ میں آنے والے تباہ کن زلزلے نے بڑی تعداد میں قیمتی انسانی جانیں لے لیں اور دیہات ملبے کا ڈھیر بن گئے۔ جھٹکے اسلام آباد سمیت پاکستان کے کئی حصوں میں بھی محسوس کیے گئے۔ ابتدائی اطلاعات کے مطابق 600 سے زائد افراد جاں بحق جبکہ متعدد زخمی ہوئے ہیں۔
وزیراعظم شہباز شریف کا اظہار افسوس
وزیراعظم پاکستان شہباز شریف نے اپنے تعزیتی پیغام میں کہا ہے کہ “افغانستان کے مشرقی حصے میں آنے والے ہلاکت خیز زلزلے سے قیمتی انسانی جانوں کے ضیاع پر دل شدید رنجیدہ ہے۔ اس مشکل وقت میں ہماری دعائیں متاثرہ خاندانوں کے ساتھ ہیں۔ پاکستانی عوام اور حکومت افغان بھائیوں اور بہنوں کے ساتھ کھڑی ہے اور ہر ممکن مدد کے لیے تیار ہے۔”
وفاقی وزیر خارجہ اسحاق ڈار نے بھی گہرے دکھ اور افسوس کا اظہار کیا۔ انہوں نے کہا کہ پاکستان افغان عوام کے غم میں برابر کا شریک ہے۔ ان کا کہنا تھا کہ “ہم متاثرہ خاندانوں کے ساتھ تعزیت کرتے ہیں اور زخمیوں کی جلد صحت یابی کے لیے دعا گو ہیں۔”
اسی طرح پاکستان کے نمائندہ خصوصی برائے افغانستان، محمد صادق نے کہا کہ افغان عوام کے دکھ پر پاکستانی عوام اور حکومت کو دلی افسوس ہے۔ انہوں نے کہا کہ “ہم دعا گو ہیں کہ زخمی جلد صحت یاب ہوں اور متاثرہ خاندانوں کو ہمت ملے۔ پاکستان مشکل کی اس گھڑی میں افغان عوام کے ساتھ ہے۔”
پاکستان نے افغان عوام سے یکجہتی کا اظہار کرتے ہوئے زلزلے سے متاثرہ علاقوں میں امدادی کارروائیوں میں ہر ممکن تعاون کی پیشکش کی ہے۔
دیکھیں: افغانستان میں تباہ کن زلزلہ، 500 سے زائد ہلاکتوں کا خدشہ