افغانستان میں طالبان حکومت کے خلاف ایک نئی مسلح مزاحمتی تحریک نے جنم لیا ہے جس نے افغانستان ملٹری سلوشن فرنٹ کے نام سے اپنی کارروائیاں ازسرنو شروع کرنے کا اعلان کر دیا ہے۔ مذکورہ تنظیم ملک میں پہلے سے متحرک نیشنل ریسسٹنس فرنٹ اور افغانستان فریڈم فرنٹ کے بعد تیسری بڑی مسلح مزاحمتی جماعت ہے۔
تفصیلات کے مطابق یہ گروہ ماضی میں یونائیٹڈ ملٹری سلوشن کے نام سے طالبان کی پہلی حکومت کے خلاف کارروائیوں میں ملوث رہا تھا۔ مذکورہ تنظیم نے اپنے حالیہ بیان میں طالبان حکومت کی پالیسیوں کو غیر آئینی، شرعی احکام کے منافی اور عوامی مفادات کے برعکس قرار دیتے ہوئے واضح کیا ہے کہ وہ ہر اس گروہ کے خلاف کارروائی کرے گی جو افغانستان کے قومی یا عوامی مفادات کو نقصان پہنچانے کی کوشش کرے۔
نئی مسلح تنظیم کی سرگرمیوں کے ازسرنو منظم ہونا افغانستان میں مزاحمتی تحریکوں کے ایک نئے دور کا اشارہ ملتا ہے جو ملک میں جاری سیاسی اور سلامتی کے چیلنجوں میں مزید اضافے کا سبب بن سکتا ہے۔
ماہرین کے مطابق افغانستان میں نئی مسلح مزاحمتی تنظیمیں آئے روز سامنے آرہی ہیں جو اس بات کا وضح ثبوت ہے کہ افغانستان میں طالبان حکومت کے خلاف فضا مزید ہموار ہوتی جارہی ہے۔
