سعودی عرب کے ولی عہد شہزادہ محمد بن سلمان نے امریکی حکاّم کی جانب سے اسرائیل کے ساتھ تعلقات معمول پر لانے کی پیشکش کو واضح طور پر مسترد کر دیا ہے۔ امریکی نیوز ویب سائٹ ایکسیوس کی رپورٹ کے مطابق ولی عہد محمد بن سلمان نے اس بارے میں اپنا مؤقف واضح کرتے ہوئے کہا ہے کہ اسرائیل کے ساتھ تعلقات کی بحالی اس وقت تک ممکن نہیں جب تک کہ اسرائیل 1967 کی اقوام متحدہ کی منظور شدہ سرحدوں کے مطابق مشرقی یروشلم میں آزاد فلسطینی ریاست کو تسلیم نہیں کرتا۔
سعودی ولی عہد محمد بن سلمان کے مطابق سعودی عرب فلسطینی عوام کے حقِ خودارادیت اور سرزمینِ فلسطین کے تحفظ کے اصول پر قائم ہے۔ کسی بھی قسم کی نارملائزیشن اس بنیادی اصول کے بغیر قابل قبول نہیں ہوگی۔
محمد بن سلمان کی جانب سے مذکورہ مؤقف ایسے وقت میں سامنے آیا ہے جب خطے میں کئی عرب ممالک نے اسرائیل کے ساتھ تعلقات کے حوالے سے مختلف اقدامات کیے ہیں ۔تاہم سعودی عرب کی پالیسی اس معاملے میں مسلسل اصولی اور واضح رہی ہے۔ رپورٹ کے مطابق سعودی موقف نے بین الاقوامی حلقوں میں واضح پیغام دیا ہے کہ فلسطین کے حقوق کے بغیر خطے میں حقیقی امن ممکن نہیں۔
