بھارت اور اسرائیل نے آزاد تجارتی معاہدے کے لیے ٹرمز آف ریفرنس پر دستخط کر دیے ہیں۔ مذکورہ اقدام دونوں ممالک کے درمیان دوطرفہ تجارت اور سرمایہ کاری کو نئی بلندیوں تک لے جانے میں اہم قدم قرار دیا جا رہا ہے۔
تفصیلات کے مطابق اسرائیلی دارالحکومت تل ابیب میں منعقدہ تقریب میں بھارتی وزیرِ تجارت و صنعت پیوش گوئل اور اسرائیلی وزیر معیشت و صنعت نیر برکت نے اس اہم دستاویز پر دستخط کیے ہیں۔ بھارتی وزیرِ تجارت نے اس موقع پر کہا کہ مذکورہ معاہدہ دونوں ممالک کے درمیان تجارت اور سرمایہ کاری کے نئے دور کا نقطہ آغاز ثابت ہوگا۔ جبکہ اسرائیلی وزیر گفتگو کرتے ہوئے کہا کہ بھارت خطے میں ایک ابھرتی ہوئی معاشی طاقت ہے جو عالمی سطح پر معیشت میں اہم کردار ادا کر رہا ہے۔
مذکورہ معاہدے کے تحت دونوں ممالک محصولاتی اور غیر محصولاتی رکاوٹیں کم کرنے، باہمی سرمایہ کاری کو فروغ دینے، ٹیکنالوجی کے تبادلے میں تعاون بڑھانے اور تجارت کے قواعد و ضوابط میں نرمی جیسے اقدامات پر توجہ مرکوز کریں گے۔ قابلِ ذکر بات یہ ہے کہ بھارت اس وقت ایشیا میں اسرائیل کا دوسرا سب سے بڑا تجارتی شراکت دار ہے اور مذکورہ معاہدہ دونوں ممالک کے معاشی تعلقات کو مزید مضبوطی فراہم کرے گا۔