طالبان حکومت نے بھارت میں اپنا پہلا سینئر سفارتی نمائندہ تعینات کر دیا ہے، جو 2021 کے بعد دونوں ممالک کے تعلقات میں اہم پیشرفت سمجھی جا رہی ہے۔
طالبان کے نائب ترجمان حافظ ضیاء احمد تکیل نے تصدیق کی ہے کہ مفتی نور احمد نور نے نئی دہلی میں افغان سفارت خانے میں سینئر سفارتی نمائندہ کا عہدہ سنبھال لیا ہے۔ تعیناتی کے فوراً بعد نور احمد نور نے بھارتی تاجروں سے ملاقات کی، جس میں دونوں ممالک کے درمیان اقتصادی اور تجارتی روابط زیرِ بحث آئے۔
دورانِ ملاقات سفارت خانے کی جانب سے افغان تاجروں کے ویزا کے عمل کو آسان بنانے اور دیگر مشکلات کو دور کرنے پر غورکیا گیا۔ فریقین نے باہمی تعلقات کو مستحکم کرنے اور تعاون کے دائرے کو وسیع کرنے پر اتفاق کیا۔
مذکورہ اقدام طالبان کے وزیر خارجہ امیر خان متقی کے اکتوبر 2025 میں بھارت کے سرکاری دورے کے بعد سامنے آیا ہے، جو گزشتہ افغان حکومت کے خاتمے کے بعد پہلا ایسا اعلی سطحی دورہ تھا۔
نئی دہلی میں افغان سفارت خانہ گزشتہ دو سال سے غیر فعال چلا آ رہا تھا، اور اپریل 2023 میں طالبان کی پہلی تعیناتی کی کوشش ناکام ہو گئی تھی۔