غزہ ایک جغرافیائی خطہ نہیں بلکہ عالمی ضمیر کا سب سے بڑا امتحان بن چکا ہے۔ دہائیوں سے جاری محاصرہ، بار بار کی جنگیں، اور اجتماعی سزا کا شکار فلسطینی عوام آج بھی انصاف کے منتظر ہیں۔ ایسے نازک وقت میں سامنے آنے والا غزہ پیس آف بورڈ بظاہر ایک نئی امید کے طور پر پیش کیا جا رہا ہے، جس کا مقصد جنگ بندی، انسانی امداد، اور غزہ کے انتظامی و سیاسی مستقبل کے لیے ایک فریم ورک تیار کرنا ہے۔ مگر سوال یہ ہے کہ کیا یہ بورڈ واقعی امن کا ذریعہ بنے گا یا ایک بار پھر طاقتوروں کی سیاست مظلوموں کے حق کو دبا دے گی؟
غزہ پیس آف بورڈ کے خدوخال اگرچہ خوش آئند دکھائی دیتے ہیں، لیکن فلسطینی تاریخ اس بات کی گواہ ہے کہ امن کے نام پر بننے والے بیشتر فورمز اصل مسئلے سے نظریں چرا لیتے ہیں۔ مسئلے کی جڑ اسرائیلی قبضہ، غیر قانونی آبادکاریاں، اور بین الاقوامی قوانین کی مسلسل خلاف ورزی ہے۔ اگر اس بورڈ کا ایجنڈا ان بنیادی حقائق کو تسلیم کیے بغیر محض انتظامی بندوبست اور انسانی امداد تک محدود رہا، تو یہ کوشش بھی ماضی کی ناکام امن اسکیموں کی طرح دم توڑ دے گی۔
غزہ پیس آف بورڈ پر سب سے بڑا سوال اس کی غیر جانبداری اور اختیار سے متعلق ہے۔ اگر فیصلہ سازی ان قوتوں کے ہاتھ میں رہی جو خود اسرائیل کی سیاسی اور عسکری سرپرستی کرتی رہی ہیں، تو انصاف کی امید کمزور پڑ جاتی ہے۔ امریکہ کا کردار خاص طور پر تشویش ناک ہے، جو ایک طرف خود کو ثالث ظاہر کرتا ہے اور دوسری طرف اسرائیل کو کھلی حمایت فراہم کرتا ہے۔ ایسے میں یہ خدشہ بجا ہے کہ یہ بورڈ مزاحمت کو کمزور کرنے اور غزہ پر ایک قابلِ قبول مگر تابع انتظام مسلط کرنے کی کوشش نہ بن جائے۔
اس عالمی منظرنامے میں پاکستان کا کردار غیر معمولی اہمیت رکھتا ہے۔ پاکستان ابتدا ہی سے فلسطینی کاز کا اصولی اور اخلاقی حامی رہا ہے۔ اقوامِ متحدہ، او آئی سی اور دیگر عالمی فورمز پر پاکستان نے ہمیشہ فلسطینی عوام کے حقِ خودارادیت، اسرائیلی جارحیت کی مذمت، اور آزاد فلسطینی ریاست کے قیام کی حمایت کی ہے۔ غزہ پیس آف بورڈ کے تناظر میں بھی پاکستان پر یہ ذمہ داری عائد ہوتی ہے کہ وہ محض علامتی حمایت پر اکتفا نہ کرے بلکہ اس پلیٹ فارم کو بین الاقوامی قانون اور انصاف کے دائرے میں رکھنے کے لیے فعال سفارتی کردار ادا کرے۔
پاکستان کی روایتی پالیسی کی عکاسی کرتی ہے کہ امن کو طاقت کے توازن سے نہیں بلکہ قانون کی بالادستی سے مشروط سمجھا جانا چاہئے۔ غزہ پیس آف بورڈ اسی صورت مؤثر ہو سکتا ہے جب اس میں فلسطینی عوام کی حقیقی نمائندگی ہو، جنگی جرائم پر احتساب کو ایجنڈے کا حصہ بنایا جائے، اور تعمیرِ نو کو سیاسی دباؤ یا سودے بازی سے آزاد رکھا جائے۔
یہ بات بھی ذہن نشین رہنی چاہیے کہ غزہ کے عوام کے لیے امن کا مطلب محض بمباری کا رک جانا نہیں، بلکہ عزت کے ساتھ جینے کا حق، آزادانہ نقل و حرکت، غزہ کی تعمیر نو اور اپنے مستقبل کا خود فیصلہ کرنے کی آزادی ہے۔ اگر غزہ پیس آف بورڈ ان بنیادی حقوق کو تسلیم نہیں کرتا تو یہ امن نہیں بلکہ ایک عارضی خاموشی ہوگی، جو کسی بھی وقت دوبارہ خونریزی میں بدل سکتی ہے۔
آخر میں، غزہ پیس آف بورڈ کو ایک موقع ضرور سمجھا جانا چاہیے، مگر اندھی امید کے ساتھ نہیں۔ پاکستان جیسے ممالک، جو اصولی مؤقف اور اخلاقی وزن رکھتے ہیں، انہیں چاہیے کہ وہ اس بورڈ کو طاقتوروں کا آلہ بننے سے روکیں۔ پاکستان اگر فعال، واضح اور جرات مندانہ کردار ادا کرتا ہے تو یہ نہ صرف فلسطینی عوام کے لیے بلکہ عالمی انصاف کے لیے بھی ایک مضبوط آواز بن سکتا ہے۔ بصورتِ دیگر، تاریخ ایک بار پھر گواہ بنے گی کہ غزہ کو وعدے تو بہت ملے، مگر امن نہیں۔
دیکھیں: ٹرمپ مسٔلہ کشمیر کو بورڈ آف پیس میں شامل سکتے ہیں، بھارت میں خدشات