لکی مروت میں ضلع کی تاریخ میں پہلی بار علماء کنونشن کا انعقاد کیا گیا، جس کا مقصد علاقے میں امن و استحکام، مذہبی ہم آہنگی اور باہمی اتحاد کو فروغ دینا تھا۔ کنونشن میں جی او سی 40 ڈویژن میجر جنرل مدثر سعید، ڈپٹی کمشنر لکی مروت حمید اللہ خان، ڈسٹرکٹ پولیس آفیسر نذیر احمد خان سمیت مختلف مکاتبِ فکر سے تعلق رکھنے والے علماء کرام اور معززین نے بڑی تعداد میں شرکت کی۔
کنونشن سے خطاب کرتے ہوئے علماء کرام نے امن کو ایک باشعور اور مستحکم معاشرے کی بنیاد قرار دیا اور ضلع میں پائیدار امن کے قیام کے لیے سول انتظامیہ اور قانون نافذ کرنے والے اداروں کے ساتھ بھرپور تعاون کے عزم کا اظہار کیا۔ علماء نے اس بات پر زور دیا کہ مذہبی رواداری، اتحاد اور برداشت ہی معاشرتی استحکام کی ضمانت ہیں۔
اس موقع پر جی او سی 40 ڈویژن میجر جنرل مدثر سعید نے اپنے خطاب میں کہا کہ معاشرتی ہم آہنگی اور قومی یکجہتی کے حصول میں علماء کرام کا کردار ناگزیر ہے۔ انہوں نے کہا کہ علماء رواداری، اتحاد اور باہمی احترام کو فروغ دے کر دیرپا امن کے قیام میں کلیدی کردار ادا کر سکتے ہیں۔ ان کا کہنا تھا کہ علاقے میں امن و سلامتی کا قیام ایک مسلسل جدوجہد ہے جس کے لیے تمام طبقات کو مل کر کام کرنا ہوگا۔
میجر جنرل مدثر سعید نے علماء کرام پر زور دیا کہ دہشت گردی جیسے ناسور کے خاتمے کے لیے وہ صفِ اوّل کا کردار ادا کریں۔ انہوں نے کہا کہ عوام اور مدارس کے طلباء تک اسلام کی درست تعلیمات پہنچانا، مدارس کی رجسٹریشن، مساجد سے مثبت اور ذمہ دارانہ پیغام دینا اور مذہبی ہم آہنگی کو فروغ دینا وقت کی اہم ضرورت ہے۔
کنونشن کے اختتام پر شرکاء نے ملک اور ضلع میں پائیدار امن کے قیام کے لیے مشترکہ دعا کی اور اس عزم کا اعادہ کیا کہ امن، اتحاد اور استحکام کے لیے اپنی کوششیں آئندہ بھی جاری رکھیں گے۔
دیکھیے: حکومت نے وادیٔ تیراہ میں فوجی حکم سے منسوب انخلاء کی خبروں کی تردید کر دی