سیکیورٹی فورسز نے خیبر ضلع اور ضلع کرم کے مشترکہ سرحدی علاقے میں ایک کامیاب انٹیلی جنس بیسڈ آپریشن کے دوران کالعدم تحریکِ طالبان پاکستان (ٹی ٹی پی) کے ایک افغان دہشت گرد کو گرفتار کر لیا۔
سیکیورٹی ذرائع کے مطابق گرفتار دہشت گرد کی شناخت جبار ولد عبدالعلی کے نام سے ہوئی ہے، جو افغان شہری اور ٹی ٹی پی کا سرگرم رکن ہے۔ دہشت گرد کو اس وقت حراست میں لیا گیا جب وہ غیر قانونی طور پر افغانستان سے پاکستان میں دراندازی کی کوشش کر رہا تھا۔
ذرائع کے مطابق گرفتار دہشت گرد سے تفتیش جاری ہے، جس کے دوران اس کے سرحد پار روابط، سہولت کاروں اور پاکستان میں ممکنہ تخریبی منصوبوں سے متعلق اہم انکشافات کی توقع ہے۔ سیکیورٹی اداروں نے علاقے میں سرچ اور کلیئرنس آپریشن بھی کیا تاکہ کسی ممکنہ ساتھی یا سہولت کار کی موجودگی کو یقینی طور پر ختم کیا جا سکے۔
سیکیورٹی حکام کا کہنا ہے کہ پاکستان کے خلاف دہشت گردی میں ملوث عناصر کی سرحد پار نقل و حرکت ناقابلِ قبول ہے اور ایسی ہر کوشش کو ناکام بنایا جائے گا۔ فورسز ملک کے سرحدی علاقوں میں امن و امان برقرار رکھنے اور دہشت گردی کے مکمل خاتمے کے لیے چوکس اور پرعزم ہیں۔
حکام نے اس عزم کا اعادہ کیا ہے کہ پاکستان میں امن کو سبوتاژ کرنے والے تمام عناصر کے خلاف بلا امتیاز کارروائیاں جاری رہیں گی اور دہشت گردوں کو قانون کے کٹہرے میں لایا جائے گا۔
