ایف سی بلوچستان (نارتھ) کے ٹریننگ سینٹر لورالائی میں 68ویں بیچ (فیز ٹو) کی پروقار پاسنگ آؤٹ پریڈ منعقد ہوئی، جس میں 1104 ریکروٹس نے کامیابی سے اپنی پیشہ ورانہ تربیت مکمل کر لی۔
تقریب کے مہمانِ خصوصی انسپکٹر جنرل ایف سی بلوچستان (نارتھ) میجر جنرل محمد عاطف مجتبیٰ تھے، جنہوں نے پریڈ کا معائنہ کیا اور تربیت مکمل کرنے والے جوانوں کو مبارکباد پیش کی۔ اس موقع پر خطاب کرتے ہوئے انہوں نے کہا کہ تمام ریکروٹس کو فخر ہونا چاہیے کہ وہ ایف سی بلوچستان (نارتھ) جیسے باوقار ادارے کا حصہ بن رہے ہیں، جو اپنی شاندار روایات، قربانیوں اور بہادری کے لیے پہچانا جاتا ہے۔
انہوں نے اس عزم کا اعادہ کیا کہ ایف سی بلوچستان (نارتھ) صوبے میں امن و امان کے قیام، سرحدوں کے تحفظ اور دہشت گردی کے خلاف کارروائیوں میں اپنا مؤثر کردار ادا کرتی رہے گی۔ ان کا کہنا تھا کہ پیشہ ورانہ مہارت، نظم و ضبط اور عوامی تعاون ہی فورس کی اصل طاقت ہیں۔
پاسنگ آؤٹ پریڈ میں نوشکی میں شہید ہونے والے خطیب امشد علی کے والدِ محترم نواب خان کو بطور مہمانِ خصوصی مدعو کیا گیا۔ تقریب کے دوران شہید کی فیملی کی قربانی کو خراجِ عقیدت پیش کیا گیا اور ان کے عزم و حوصلے کو سراہا گیا۔
تقریب میں قبائلی عمائدین، مقامی شخصیات، معزز مہمانوں اور سول سوسائٹی کے نمائندگان کی بڑی تعداد نے شرکت کی۔ شرکاء نے ایف سی اور عوام کے درمیان مضبوط تعلقات اور باہمی اعتماد کو امن کے قیام کے لیے ناگزیر قرار دیا۔
تقریب کے اختتام پر نمایاں کارکردگی کا مظاہرہ کرنے والے ریکروٹس میں خصوصی انعامات تقسیم کیے گئے، جبکہ شرکاء نے نئے شامل ہونے والے جوانوں کے لیے نیک تمناؤں کا اظہار کیا۔