وفاقی حکومت نے پیٹرولیم مصنوعات کی قیمتوں میں بڑے اضافے کا اعلان کرتے ہوئے عوام پر مہنگائی کا نیا بوجھ لاد دیا ہے۔ پیٹرولیم ڈویژن کی جانب سے جاری کردہ باقاعدہ نوٹیفکیشن کے مطابق نئی قیمتوں کا اطلاق فوری طور پر کر دیا گیا ہے۔
نوٹیفکیشن کے مطابق پیٹرول کی قیمت میں 5 روپے فی لیٹر اضافہ کیا گیا ہے، جس کے بعد پیٹرول کی نئی قیمت 253 روپے 17 پیسے سے بڑھ کر 258 روپے 17 پیسے فی لیٹر مقرر ہو گئی ہے۔ اسی طرح ہائی اسپیڈ ڈیزل کی قیمت میں 7 روپے 32 پیسے فی لیٹر کا بھاری اضافہ کیا گیا ہے، جس کے بعد ڈیزل کی نئی قیمت 275 روپے 70 پیسے فی لیٹر تک پہنچ گئی ہے۔
حکومت نے مٹی کے تیل کی قیمت میں بھی 4 روپے 73 پیسے فی لیٹر اضافہ کیا ہے، جس کے بعد اس کی نئی قیمت مقرر کی گئی ہے۔ واضح رہے کہ دو روز قبل انڈسٹری ذرائع کی جانب سے 4 سے 6 روپے تک اضافے کا امکان ظاہر کیا گیا تھا، تاہم حکومت نے ڈیزل کی قیمت میں توقع سے زیادہ اضافہ کیا ہے۔
پیٹرولیم مصنوعات کی قیمتوں میں اس حالیہ اضافے سے ٹرانسپورٹ کے کرایوں اور اشیائے خوردونوش کی قیمتوں میں مزید اضافے کا خدشہ پیدا ہو گیا ہے، جو پہلے سے مہنگائی کی چکی میں پسی ہوئی عوام کے لیے مزید مشکلات کا سبب بنے گا۔