افغان طالبان کے اہم رُکن عبدالحمید خراسانی نے ‘طلوع نیوز’ پر گفتگو کرتے ہوئے انتہائی جارحانہ اور دھمکی آمیز لہجہ اختیار کیا ہے۔ انہوں نے دعویٰ کیا ہے کہ ان کے پاس خودکش بمباروں کا ایک ایسا منظم گروہ موجود ہے جس کے ذریعے وہ پوری غیر مسلم دنیا کا مقابلہ کرنے کی بھرپور صلاحیت رکھتے ہیں۔
پاکستان کے حوالے سے تشویشناک انکشافات کرتے ہوئے عبدالحمید خراسانی نے کہا کہ ان کے تربیت یافتہ افراد پاکستان کے اندر بھی موجود ہیں۔ انہوں نے واضح طور پر کالعدم عسکریت پسند گروہوں ‘بلوچستان لبریشن آرمی’ اور ‘تحریک طالبان پاکستان’ کی طرف اشارہ کرتے ہوئے کہا کہ یہ عناصر پاکستان کے اندر کسی بھی وقت بڑے حملے کرنے کی صلاحیت رکھتے ہیں۔
عبد الحمید خراسانی کا یہ بیان ایسے وقت میں سامنے آیا ہے جب پاکستان مسلسل افغان حکومت سے مطالبہ کرتا آ رہا ہے کہ وہ اپنی سرزمین پاکستان کے خلاف دہشت گردی کے لیے استعمال ہونے سے روکے۔ دفاعی ماہرین کا کہنا ہے کہ افغان طالبان کے رکن کی جانب سے بی ایل اے اور ٹی ٹی پی جیسے گروہوں کی کھلی حمایت اور ان کے ساتھ روابط کا اعتراف خطے کی سکیورٹی صورتحال کو مزید پیچیدہ بنا سکتا ہے۔
انٹرویو کے دوران خراسانی نے مزید کہا کہ ان کے نظریاتی جنگجو سرحدوں کی قید سے آزاد ہیں، جس نے افغان سرزمین کے پڑوسی ممالک کے خلاف استعمال ہونے سے متعلق عالمی خدشات کو مزید تقویت دی ہے۔ اس اشتعال انگیز بیان پر تاحال افغان طالبان کی مرکزی قیادت یا وزارتِ خارجہ کی جانب سے کوئی باضابطہ وضاحت سامنے نہیں آئی ہے۔
دیکھیے: طالبان حکومت کے خلاف ”افغانستان انڈیپینڈس فرنٹ” کے نام سے نئی مزاحمتی تحریک منظر عام پر آگئی