خیبر پختونخوا کے ضلع کوہاٹ میں دہشت گردانہ واقعے میں ڈی ایس پی اسد سمیت چار پولیس اہلکار شہید ہو گئے ہیں۔ پولیس ذرائع کے مطابق یہ واقعہ لاچی کے علاقے میں شکردرہ روڈ پر پیش آیا، جہاں نامعلوم مسلح دہشت گردوں نے پولیس موبائل کو نشانہ بناتے ہوئے اس پر اندھا دھند فائرنگ کر دی۔
حملے کے نتیجے میں ڈی ایس پی اسد اور ان کے ساتھ موجود اہلکار شدید زخمی ہوئے، جو زخموں کی تاب نہ لاتے ہوئے جامِ شہادت نوش کر گئے۔
واقعے کی اطلاع ملتے ہی پولیس اور سکیورٹی فورسز کی بھاری نفری جائے وقوعہ پر پہنچ گئی اور علاقے کو مکمل طور پر سیل کر دیا گیا۔ زخمی اور شہید اہلکاروں کو فوری طور پر قریبی ہسپتال منتقل کیا گیا جہاں ڈاکٹروں نے چاروں کی شہادت کی تصدیق کر دی ہے۔
پولیس حکام کا کہنا ہے کہ حملہ آوروں کی تلاش کے لیے گرد و نواح کے علاقوں میں بڑے پیمانے پر سرچ آپریشن شروع کر دیا گیا ہے اور فرار کے تمام راستوں پر ناکہ بندی سخت کر دی گئی ہے۔
دیکھیے: ڈی آئی خان میں سکیورٹی فورسز کا کامیاب آپریشن؛ 5 دہشت گرد ہلاک
