پاکستان کے وزیرِ مملکت برائے داخلہ طلال چوہدری نے ترکیہ کا دو روزہ اہم سرکاری دورہ مکمل کر لیا ہے، جس کا محور سکیورٹی تعاون، انسدادِ دہشت گردی اور منشیات کی روک تھام جیسے تزویراتی شعبوں میں دوطرفہ اشتراک کو مزید مستحکم کرنا تھا۔
دورے کے دوران طلال چوہدری کی قیادت میں پاکستانی وفد نے، جس میں سیکرٹری داخلہ اور وزارتِ داخلہ کے اعلیٰ حکام شامل تھے، ترک نائب وزیرِ داخلہ منیر کارالوغلو اور دیگر حکام سے تفصیلی ملاقاتیں کیں۔ ان نشستوں میں دونوں ممالک کی وزارتِ داخلہ کے مابین ہم آہنگی بڑھانے اور بہترین پیشہ ورانہ تجربات کے تبادلے پر اتفاق کیا گیا۔ پاکستانی وفد نے ترکیہ کے پولیس، امیگریشن اور انسدادِ منشیات کے محکموں کا بھی دورہ کیا تاکہ عملی تعاون کے نئے راستے تلاش کیے جا سکیں۔
سکیورٹی ماہرین اس دورے کو پاکستان کی فعال سکیورٹی سفارت کاری کا تسلسل قرار دے رہے ہیں۔ پاکستان نے داعش اور پی کے کے کے خلاف ترکیہ کے کامیاب تجربات سے استفادہ کرتے ہوئے اپنی سرزمین پر داعش اور ٹی ٹی پی کے فتنے کو کچلنے اور داخلی استحکام کو یقینی بنانے کے عزم کا اعادہ کیا ہے۔ یہ روابط دہشت گردی اور سرحد پار سکیورٹی خطرات کے خلاف علاقائی اتحاد کا ایک واضح پیغام ہیں، جس سے پاکستان کی اسٹریٹجک ساکھ کو عالمی سطح پر تقویت ملی ہے۔
واضح رہے کہ یہ دورہ دونوں برادر ممالک کے مابین اسٹریٹجک شراکت داری کے اس وسیع تر فریم ورک کا حصہ ہے جس کی بنیاد گزشتہ برسوں میں صدر رجب طیب اردوان اور وزیرِ اعظم شہباز شریف نے رکھی تھی۔ دفاعی شعبے میں ترکیہ پاکستان کا ایک بڑا شراکت دار بن کر ابھرا ہے، جبکہ تجارتی حجم میں سالانہ 35 فیصد اضافہ ریکارڈ کیا گیا ہے جسے اب 5 ارب ڈالر تک لے جانے کا ہدف مقرر ہے۔ طلال چوہدری کے اس دورے سے نہ صرف سکیورٹی تعلقات کو نئی جلا ملی ہے بلکہ یہ مشترکہ اسلامی اقدار اور باہمی مفادات پر مبنی پائیدار تعلقات کی بھی عکاسی کرتا ہے۔
دیکھیے: سہیل آفریدی کے “عمران خان رہائی فورس” کے قیام کے اعلان نے سیاسی حلقوں میں نئی بحث چھیڑ دی