بلوچستان کے سرحدی شہر چمن میں نامعلوم مسلح افراد نے روغانی روڈ پر سکیورٹی فورسز کی گاڑی کو نشانہ بنایا، جس کے نتیجے میں تین اہلکار شہید جبکہ ایک شدید زخمی ہو گیا۔
پولیس حکام کے مطابق حملہ اس وقت کیا گیا جب سکیورٹی اہلکار معمول کی گشت پر علاقے سے گزر رہے تھے۔ نامعلوم حملہ آوروں نے اچانک فائرنگ کی اور واردات کے بعد فرار ہونے میں کامیاب ہو گئے۔ جائے وقوعہ کو گھیرے میں لے کر شواہد اکٹھے کیے جا رہے ہیں جبکہ حملہ آوروں کی تلاش کے لیے سرچ آپریشن شروع کر دیا گیا ہے۔
شہید اور زخمی اہلکاروں کو فوری طور پر چمن سول اسپتال منتقل کیا گیا جہاں زخمی کو طبی امداد فراہم کی جا رہی ہے۔ اسپتال ذرائع کے مطابق زخمی اہلکار کی حالت تشویشناک بتائی جا رہی ہے۔
ابتدائی طور پر کسی گروہ نے حملے کی ذمہ داری قبول نہیں کی۔ پولیس کا کہنا ہے کہ واقعے کی مختلف پہلوؤں سے تحقیقات جاری ہیں اور حملہ آوروں کو جلد قانون کے کٹہرے میں لایا جائے گا۔
یاد رہے کہ چمن اور اس کے گرد و نواح کے علاقوں میں ماضی میں بھی سکیورٹی فورسز پر حملوں کے واقعات پیش آتے رہے ہیں، جس کے باعث علاقے میں سکیورٹی ہائی الرٹ ہے۔