خطے میں بڑھتی ہوئی فوجی کشیدگی اور ایرانی حملوں کے شدید خدشات کے پیشِ نظر پرتگالی فٹ بالر کرسٹیانو رونالڈو نے سعودی دارالحکومت ریاض چھوڑ دیا ہے۔ اطلاعات کے مطابق النصر کلب کے اسٹار کھلاڑی اپنے نجی طیارے کے ذریعے اسپین کے دارالحکومت میڈرڈ روانہ ہو گئے ہیں۔
غیر ملکی خبر رساں ایجنسی کی رپورٹ کے مطابق، رونالڈو کا 61 ملین پاؤنڈ مالیت کا نجی طیارہ گزشتہ رات مقامی وقت کے مطابق تقریباً 8 بجے ریاض سے روانہ ہوا، جو فلائٹ ٹریکر کے مطابق مصر اور بحیرہ روم کی فضائی حدود سے گزرتا ہوا رات ایک بجے کے قریب میڈرڈ پہنچا۔
رونالڈو ریاض میں اپنی شریکِ حیات اور پانچ بچوں کے ہمراہ سعودی عرب میں مقیم تھے، تاہم تاحال یہ تصدیق نہیں ہو سکی کہ آیا ان کا خاندان بھی اسی پرواز میں ان کے ہمراہ تھا یا وہ پہلے ہی منتقل ہو چکے تھے۔
فٹ بالر کا یہ اچانک فیصلہ سعودی عرب اور ایران کے درمیان حالیہ کشیدگی اور ممکنہ فضائی حملوں کے تناظر میں دیکھا جا رہا ہے، جس نے عالمی سطح پر کھیلوں کی سرگرمیوں اور بین الاقوامی ستاروں کی حفاظت کے حوالے سے تشویش پیدا کر دی ہے۔
دیکھیے: ایران کی صورتحال اور پاکستان میں بے جا اشتعال: حبِ وطنی یا منظم سازش؟
