خیبر پختونخوا کے قبائلی اور جنوبی اضلاع میں دھماکوں کے دو مختلف واقعات میں کم از کم 13 افراد جاں بحق جبکہ درجنوں زخمی ہو گئے ہیں۔
سکیورٹی ذرائع کے مطابق جنوبی وزیرستان لوئر کے علاقے وانا بازار میں پولیس وین کو نشانہ بنانے کے لیے نصب دیسی ساختہ بم (آئی ای ڈی) دھماکے کے نتیجے میں ایک پولیس اہلکار سمیت کم از کم 10 افراد جاں بحق اور 26 زخمی ہو گئے۔ حکام کے مطابق زخمیوں میں بڑی تعداد عام شہریوں کی ہے جنہیں فوری طور پر قریبی اسپتالوں میں منتقل کر دیا گیا، جبکہ سکیورٹی فورسز نے علاقے کو گھیرے میں لے کر تحقیقات شروع کر دی ہیں۔
دوسری جانب ضلع لکی مروت میں بھی دھماکے کے دو الگ واقعات پیش آئے ہیں۔ پولیس کے مطابق ایک واقعے میں پولیس امن کمیٹی کو نشانہ بنانے کے لیے استعمال ہونے والے کواڈ کاپٹر ڈرون حملے میں کم از کم دو افراد جاں بحق جبکہ سات زخمی ہوئے۔
اسی ضلع کے علاقے منجی والا میں ایک اور ڈرون حملے میں پولیس امن کمیٹی سے وابستہ افراد کے رشتہ داروں کو نشانہ بنایا گیا جس کے نتیجے میں ایک شخص جاں بحق اور ایک زخمی ہو گیا جبکہ اطراف کی عمارتوں کو بھی نقصان پہنچا۔ پولیس حکام کے مطابق واقعات کی مزید تحقیقات جاری ہیں اور تفصیلات جمع کی جا رہی ہیں۔