امریکا کے دارالحکومت واشنگٹن میں دوسری جنگ عظیم کی یادگار کے سامنے رقص کی ویڈیو سوشل میڈیا پر پوسٹ کرنے کے بعد بھارتی نژاد ٹیک ورکر مدھو راجو شدید تنازع کا شکار ہو گئے ہیں۔
میڈیا رپورٹس کے مطابق ویڈیو وائرل ہونے کے بعد متعدد امریکی صارفین نے تاریخی یادگار کے تقدس کا احترام نہ کرنے پر سخت ردعمل دیا اور ان کی ملک بدری کا مطالبہ کیا۔
رپورٹس کے مطابق بعض امریکی حکام بھی اس واقعے پر برہمی کا اظہار کر رہے ہیں اور مدھو راجو کے خلاف ممکنہ قانونی کارروائی اور امیگریشن اسٹیٹس کا جائزہ لیا جا رہا ہے۔
ویڈیو میں مدھو راجو کو واشنگٹن میں واقع ورلڈ وار ٹو میموریل کے سامنے کوریوگرافڈ ڈانس کرتے دیکھا جا سکتا ہے جس کے بعد آن لائن شدید تنقید شروع ہو گئی۔
تنازع بڑھنے پر سوشل میڈیا صارفین کی جانب سے ان کی ذاتی معلومات بھی شیئر کی جانے لگیں، جس کے بعد مدھو راجو نے اپنے سوشل میڈیا اکاؤنٹس حذف کر دیے۔
غیر ملکی میڈیا کے مطابق مدھو راجو امریکی شہر ڈیلاس میں مقیم تھے اور امریکی سائبر سیکیورٹی کمپنی پالو آلٹو نیٹ ورکس سے وابستہ رہے ہیں جبکہ وہ امریکا میں ایچ ون بی ورک ویزا پر موجود تھے۔
دیکھئیے:امریکا کے نئے ہائی ٹیک اتحاد میں بھارت کی عدم شمولیت؛صلاحیت پر مبنی عالمی بلاکس کی تشکیل