وفاقی حکومت نے مٹی کے تیل کی قیمت میں 39 روپے 20 پیسے فی لیٹر اضافہ کر دیا ہے جس کے بعد نئی قیمت 358 روپے ایک پیسہ فی لیٹر مقرر کر دی گئی ہے۔
وزارت توانائی کی جانب سے جاری نوٹیفکیشن کے مطابق حکومت نے پیٹرول اور ڈیزل کی قیمتیں برقرار رکھنے کا فیصلہ کیا ہے تاہم دونوں مصنوعات پر پٹرولیم لیوی برقرار رکھی گئی ہے۔
حکام کے مطابق پیٹرول پر فی لیٹر 105 روپے 37 پیسے جبکہ ڈیزل پر 55 روپے 24 پیسے فی لیٹر لیوی برقرار رہے گی۔
وزارت توانائی کا کہنا ہے کہ پیٹرول اور ڈیزل کی قیمتیں برقرار رکھنے کیلئے حکومت 14 مارچ سے 20 مارچ تک 23 ارب روپے کی سبسڈی ادا کرے گی۔
حکام کے مطابق پیٹرول پر فی لیٹر 49 روپے 63 پیسے جبکہ ڈیزل پر فی لیٹر 75 روپے 5 پیسے سبسڈی دی جائے گی جو آئل مارکیٹنگ کمپنیوں کو پرائس ڈیفرینشل کلیمز کی مد میں ادا کی جائے گی۔
وزارت توانائی کے مطابق اس مقصد کیلئے اوگرا کے ذریعے بلوں کی تصدیق اور آڈٹ کے بعد ادائیگیاں کی جائیں گی جبکہ کابینہ کی اقتصادی رابطہ کمیٹی وزیراعظم کفایت شعاری فنڈ میں 27 ارب 10 کروڑ روپے منتقل کرنے کی منظوری بھی دے چکی ہے۔
دیکھئیے:بحیرہ احمر کے راستے خام تیل کی ترسیل، سعودی عرب کا پاکستان کے لیے بڑا اقدام