ایچ بی ایل پاکستان سپر لیگ (پی ایس ایل) 11 کے ٹکٹس کی آن لائن فروخت کل سے شروع ہوگی۔
پی ایس ایل گیارہ ایڈیشن میں پہلی بار 8 ٹیمیں حصہ لیں گی جبکہ مجموعی طور پر 44 میچز کھیلے جائیں گے۔
میچز لاہور، کراچی، راولپنڈی، ملتان، فیصل آباد اور پشاور میں ہوں گے۔ فیصل آباد اور پشاور پہلی بار پی ایس ایل میچز کی میزبانی کریں گے۔
ٹکٹ کی قیمتیں شہر کے حساب سے مختلف ہوں گی، لاہور اور کراچی میں جنرل ٹکٹ 250 روپے سے شروع ہوگا، فیصل آباد میں 300 جبکہ ملتان اور راولپنڈی میں 400 روپے سے دستیاب ہوگا۔
ایک شناختی کارڈ پر زیادہ سے زیادہ 8 ٹکٹس خریدے جا سکیں گے۔ چند شہروں میں محدود ای ٹکٹ کی سہولت بھی دستیاب ہوگی۔
پشاور میں 28 مارچ کے میچ کیلئے فیملی انکلوژر رکھا گیا ہے جبکہ وی آئی پی فیملی زون ٹکٹ 2000 روپے میں دستیاب ہوگا۔ فزیکل ٹکٹس 24 مارچ سے ٹی سی ایس سینٹرز پر ملنا شروع ہو جائیں گی۔
سی ای او پی ایس ایل سلمان نصیر کا کہنا ہے کہ ٹکٹ قیمتیں کم رکھنے کی کوشش کی گئی ہے تاکہ زیادہ شائقین اسٹیڈیم آ سکیں۔
دیکھئیے:متنازع ڈی آر ایس ریویو: پاکستان کرکٹ بورڈ کا احتجاج، میچ ریفری کو شکایت درج