واشنگٹن: امریکا نے آبنائے ہرمز میں آمد و رفت بحال کرنے کیلئے مرحلہ وار فوجی آپریشن شروع کر دیا ہے، جس کے تحت جنگی طیارے اور اپاچی ہیلی کاپٹرز تعینات کر دیے گئے ہیں۔
امریکی میڈیا کے مطابق اے-10 وار تھوگ طیارے کم بلندی پر پرواز کرتے ہوئے ایران کے جنوبی ساحل کے قریب تیز رفتار کشتیوں اور ڈرونز کو نشانہ بنا رہے ہیں۔ حکام کا کہنا ہے کہ کارروائی کا مقصد بارودی سرنگوں، مسلح کشتیوں اور کروز میزائلوں کو تباہ کرنا ہے۔
امریکی جنرل ڈین کین کے مطابق آپریشن کامیاب ہونے کی صورت میں امریکی بحریہ خلیج میں تجارتی جہازوں کو محفوظ راستہ فراہم کر سکے گی۔ تاہم انہوں نے خبردار کیا کہ مکمل سکیورٹی بحال کرنے میں کئی ہفتے لگ سکتے ہیں۔
واضح رہے کہ مارچ کے آغاز سے آبنائے ہرمز بند ہونے کے باعث عالمی تیل سپلائی متاثر ہوئی، جس کے نتیجے میں برینٹ خام تیل کی قیمتیں 119 ڈالر فی بیرل تک پہنچ گئیں، بعد ازاں یہ تقریباً 108 ڈالر تک آگئیں۔
ماہرین کے مطابق آبنائے ہرمز دنیا کی تقریباً 20 فیصد تیل برآمدات کا اہم راستہ ہے، اس لیے اس کی بندش عالمی معیشت پر براہ راست اثر انداز ہوتی ہے۔
دیکھئیے:امریکا پاکستان توانائی تعاون: صاف توانائی کی جانب پیش رفت تیز