اسلام آباد: وزیراعظم شہباز شریف نے پیٹرول کی قیمت میں فوری طور پر 80 روپے فی لیٹر کمی کا اعلان کر دیا، جس کے بعد نئی قیمت 378 روپے فی لیٹر مقرر کر دی گئی ہے۔
قوم سے خطاب میں وزیراعظم نے کہا کہ قیمتوں میں کمی کا اطلاق آج رات 12 بجے سے ہوگا، جبکہ پیٹرول پر عائد لیوی میں بھی 80 روپے فی لیٹر کمی کی گئی ہے۔
وزیراعظم کا کہنا تھا کہ خطے میں تیل کی قیمتیں تیزی سے بڑھ رہی ہیں اور عالمی سطح پر مہنگائی نے بڑی معیشتوں کو بھی متاثر کیا ہے، ایسے میں عام آدمی کو ریلیف دینا حکومت کی ترجیح ہے۔
انہوں نے کہا کہ قومی وسائل محدود ہونے کے باوجود حکومت نے وسیع مشاورت کے بعد یہ فیصلہ کیا۔ اس سلسلے میں ایوان صدر میں اہم اجلاس ہوا جس میں صدر مملکت، چاروں وزرائے اعلیٰ، آزاد کشمیر کے وزیراعظم اور اعلیٰ عسکری قیادت نے شرکت کی۔
وزیراعظم نے پٹرول ریلیف کے ساتھ ٹرانسپورٹ اور زرعی شعبے کیلئے بھی سبسڈی پیکج کا اعلان کیا۔ چھوٹے ٹرکوں کو 70 ہزار، بڑے ٹرکوں کو 80 ہزار اور پبلک ٹرانسپورٹ کو ایک لاکھ روپے ماہانہ سبسڈی دی جائے گی۔
انہوں نے کہا کہ مال بردار گاڑیوں کیلئے 100 روپے فی لیٹر کے حساب سے ڈیزل سبسڈی فراہم کی جائے گی، جبکہ چھوٹے کسانوں کو 1500 روپے فی ایکڑ امداد دی جائے گی۔
وزیراعظم نے یہ بھی اعلان کیا کہ پاکستان ریلوے کی اکانومی کلاس کے کرایوں میں اضافہ نہیں کیا جائے گا تاکہ عوام کو مزید ریلیف مل سکے۔
وزیراعظم کے مطابق اب تک پٹرولیم مصنوعات پر 129 ارب روپے کی سبسڈی دی جا چکی ہے، جبکہ صوبوں نے بھی اس قومی اقدام میں تعاون کی یقین دہانی کرائی ہے۔
دیکھئیے:جنگ کے پھیلاؤ کے سنگین اثرات: ایران کی حکمت عملی، خلیجی خطہ اور عالمی خدشات