اسلام آباد: پاکستان کے خلیجی ممالک کے ساتھ سفارتی تعلقات سے متعلق شہباز گل کے بیان کو حقائق کے برعکس قرار دیتے ہوئے تجزیہ کاروں اور سفارتی حلقوں نے اسے گمراہ کن اور بے بنیاد دعویٰ قرار دے دیا ہے۔
سوشل میڈیا پر شہباز گل کی جانب سے یہ مؤقف پیش کیا گیا کہ ایران نے پاکستان میں مذاکرات سے انکار کیا کیونکہ یہ ایک مبینہ “جال” تھا، تاہم ماہرین کے مطابق یہ دعویٰ ایک معروف دانشور ولی نصر سے غلط طور پر منسوب کیا گیا۔
تجزیہ کاروں کے مطابق ولی نصر نے اپنے انٹرویو میں پاکستان کے حوالے سے کوئی ایسی بات نہیں کی بلکہ انہوں نے ایران کے امریکہ پر عدم اعتماد کا ذکر کیا، جو ماضی کے جوہری معاہدے سے امریکی دستبرداری کے تناظر میں تھا۔
سفارتی ذرائع کے مطابق ایران کے وزیر خارجہ نے بھی اس تاثر کی تردید کرتے ہوئے واضح کیا کہ پاکستان میں مذاکرات پر انہیں کوئی اعتراض نہیں تھا، تاہم وہ امریکی تجاویز پر بات چیت کیلئے تیار نہیں تھے۔
ماہرین کا کہنا ہے کہ اس وضاحت کے بعد یہ دعویٰ بے بنیاد ثابت ہو گیا کہ ایران نے پاکستان کو کسی سازش کا حصہ سمجھ کر مذاکرات سے انکار کیا۔
تجزیہ کاروں کے مطابق اس نوعیت کی غلط معلومات نہ صرف عوام کو گمراہ کرتی ہیں بلکہ پاکستان کے سفارتی تعلقات کو بھی متاثر کرنے کی کوشش ہوتی ہے، جسے ذمہ دارانہ طرز عمل کے خلاف قرار دیا جا رہا ہے۔
انہوں نے زور دیا کہ اہم علاقائی معاملات پر غیر مصدقہ بیانات اور سیاسی پوائنٹ اسکورنگ کے بجائے حقائق پر مبنی مؤقف اختیار کرنا ضروری ہے۔
دیکھئیے:اتحاد المجاہدین پاکستان کا پوسٹر جعلی نکلا: گلگت بلتستان میں کسی حملے کا کوئی واقعہ پیش نہیں آیا
