راولپنڈی: سکیورٹی اداروں نے راولپنڈی میں غیرقانونی طور پر مقیم افغان باشندوں کے خلاف کارروائی کرتے ہوئے 23 افراد کو گرفتار کر لیا، جن میں سے متعدد کے پاس جعلی دستاویزات پائی گئیں۔
پولیس کے مطابق تھانہ ریس کورس کے علاقے میں سرچ آپریشن کے دوران 15 افغان باشندوں کو حراست میں لیا گیا۔ جانچ پڑتال کے دوران ان کی جانب سے پیش کی گئی دستاویزات جعلی ثابت ہوئیں، جس کے بعد انہیں تھانے منتقل کر دیا گیا۔
زیر حراست افراد میں نکیال خان، محمد جاوید، اعجاز، عمران، یاسمین بی بی، عبدالعزیز، سمین خان، محمد نبی، محمد تیمور اسماعیل، عامر خان، ابراہیم، گل بشرے اور عبدالغنی سمیت دیگر شامل ہیں۔
دوسری جانب تھانہ روات پولیس نے بھی کارروائی کرتے ہوئے ایک ہی خاندان کے 8 افغان باشندوں کو تحویل میں لے لیا ہے، جن سے تفتیش جاری ہے۔
پولیس حکام کا کہنا ہے کہ شہر میں غیرقانونی رہائش اور جعلی دستاویزات کے خلاف کارروائیاں جاری رہیں گی، جبکہ تمام گرفتار افراد کے قانونی اسٹیٹس کی مزید چھان بین کی جا رہی ہے۔