پاکستان اور سعودی عرب کے درمیان دفاعی تعلقات میں ایک اہم پیش رفت سامنے آئی ہے، جس کے تحت پاک فضائیہ کے دستے سعودی عرب کے کنگ عبدالعزیز ایئر بیس پہنچ گئے ہیں۔ عسکری ذرائع کے مطابق یہ پیش رفت دونوں ممالک کے درمیان موجود اسٹریٹجک دفاعی تعاون کے فریم ورک کے تحت عمل میں آئی ہے۔
ذرائع کا کہنا ہے کہ اس تعیناتی میں پاک فضائیہ کے لڑاکا اور معاون طیاروں کے ساتھ ساتھ مختلف آپریشنل یونٹس بھی شامل ہیں، جن کا مقصد مشترکہ دفاعی تیاریوں، تربیتی مشقوں اور آپریشنل ہم آہنگی کو مزید بہتر بنانا ہے۔
سعودی وزارتِ دفاع کی جانب سے اس پیش رفت کو دوطرفہ دفاعی شراکت داری میں ایک اہم سنگ میل قرار دیا گیا ہے۔ بیان کے مطابق پاکستانی فضائی دستوں کی موجودگی نہ صرف مشترکہ دفاعی صلاحیتوں میں اضافے کا باعث بنے گی بلکہ خطے میں امن و استحکام کے فروغ میں بھی معاون ثابت ہوگی۔
دفاعی تجزیہ کاروں کا کہنا ہے کہ موجودہ علاقائی سکیورٹی صورتحال کے تناظر میں پاکستان اور سعودی عرب کے درمیان یہ تعاون غیر معمولی اہمیت رکھتا ہے۔ ان کے مطابق اس اقدام سے دونوں ممالک کی افواج کے درمیان عملی تجربات کے تبادلے اور مشترکہ حکمتِ عملی کی تشکیل میں مدد ملے گی۔
