اقوامِ متحدہ میں پاکستان کے نائب مستقل مندوب عثمان جدون نے نیویارک میں او آئی سی کے سفیروں کے اہم اجلاس میں شرکت کی، جہاں لبنان کی سنگین انسانی صورتحال پر غور کیا گیا۔ اجلاس سے خطاب کرتے ہوئے انہوں نے لبنان میں بڑھتے ہوئے انسانی بحران پر گہری تشویش کا اظہار کیا اور کہا کہ ہر گزرتے دن کے ساتھ وہاں صورتحال ابتر ہوتی جا رہی ہے۔ انہوں نے جنوبی علاقوں اور گنجان آباد مقامات پر اسرائیلی بمباری کو شہریوں کے لیے شدید خطرہ قرار دیا۔
خودمختاری کی حمایت
عثمان جدون نے واضح کیا کہ پاکستان لبنان کی خودمختاری، وحدت اور علاقائی سالمیت کی مکمل حمایت کرتا ہے۔ انہوں نے اسرائیل کی مسلسل فوجی جارحیت کو بین الاقوامی انسانی قوانین کی کھلی خلاف ورزی قرار دیتے ہوئے مطالبہ کیا کہ شہری انفراسٹرکچر کی تباہی کا سلسلہ فوری طور پر بند کیا جائے۔ انہوں نے لبنان کی حکومت کی جانب سے امن و استحکام کی بحالی اور ریاستی اختیار کو مضبوط بنانے کے اقدامات، بشمول 2 مارچ کے کابینہ فیصلے کو بھی سراہا۔
امن دستوں پر حملے اور سفارتی حل
پاکستانی مندوب نے اقوامِ متحدہ کے امن دستوں پر اسرائیلی حملوں کی شدید الفاظ میں مذمت کی، جن میں متعدد اہلکار زخمی ہوئے۔ انہوں نے عالمی برادری پر زور دیا کہ متاثرہ علاقوں تک بلا رکاوٹ انسانی رسائی اور ہنگامی فنڈنگ کو یقینی بنایا جائے۔ عثمان جدون کا کہنا تھا کہ خطے کو مزید تباہی سے بچانے کے لیے تحمل، کشیدگی میں کمی اور نئی سفارتی کوششیں ناگزیر ہیں، کیونکہ پائیدار امن صرف سیاسی مکالمے اور عالمی قوانین کے احترام سے ہی ممکن ہے۔