بلوچستان میں دہشت گرد تنظیم بلوچ لبریشن آرمی کی جابرانہ کاروائیوں اور معصوم شہریوں پر مظالم کے خلاف مقامی بلوچ خواتین نے کھل کر مزاحمت کا آغاز کر دیا ہے۔ سوشل میڈیا پر وائرل ہونے والے ایک حالیہ اور انتہائی جرات مندانہ ویڈیو بیان میں بلوچستان کی ایک بہادر بیٹی نے دہشت گردوں کو براہِ راست للکارتے ہوئے ان کی بزدلانہ کارروائیوں کو شدید تنقید کا نشانہ بنایا ہے۔ بلوچ خاتون نے واشگاف الفاظ میں کہا، میں اپنی حکومت کے ساتھ کھڑی ہوں، میں اپنے عوام کے ساتھ کھڑی ہوں۔
بچوں اور خواتین پر ظلم
اپنے جذباتی اور پرعزم پیغام میں بلوچ بیٹی نے دہشت گردوں کے نیٹ ورک کو مخاطب کرتے ہوئے کہا کہ جو عناصر ملک اور صوبے میں امن و امان کو تباہ کر کے شہریوں کو ڈرانا اور خوفزدہ کرنا چاہتے ہیں، وہ خود اپنے اوپر لعنت بھیجیں۔ انہوں نے بی ایل اے کے دہشت گردوں کی بزدلی کو بے نقاب کرتے ہوئے کہا کہ معصوم بچوں کو دہشت زدہ کرنا، نونہالوں پر ظلم ڈھانا اور خواتین کو نشانہ بنانا کوئی بہادری نہیں بلکہ بدترین بزدلی کی نشانی ہے۔
دہشت گردوں کو للکار
بلوچستان کی اس بیٹی نے دہشت گردی کے خلاف صوبے کے عوام کے غیر متزلزل عزم کی عکاسی کرتے ہوئے تنظیم کو کھلا چیلنج دیا۔ انہوں نے کہا، “میں ایک خاتون، ایک بیٹی اور بلوچستان کی بیٹی ہو کر تمہیں للکارتی ہوں کہ اگر ہمت ہے تو سامنے آؤ۔” مقامی حلقوں کے مطابق، ایک بلوچ خاتون کی طرف سے دہشت گردوں کو اس طرح سرِعام اور براہِ راست للکارنا اس بات کا ثبوت ہے کہ اب صوبے کے غیور عوام دہشت گردوں کے جھوٹے بیانیے اور خوف کے بت کو پاش پاش کر چکے ہیں۔
بی ایل اے کے خلاف عوامی لہر
سیاسی اور سماجی مبصرین کے مطابق یہ بیان ظاہر کرتا ہے کہ اب بلوچستان کی خواتین بی ایل اے کی دہشت گردی کی مہم سے مکمل طور پر تنگ آ چکی ہیں اور ان بلوچ دشمن عناصر کے خلاف اپنی مضبوط آواز اور عزم کا اظہار کر رہی ہیں۔ صوبے میں معصوم شہریوں، خواتین اور بچوں کو نشانہ بنانے کی پالیسی نے دہشت گردوں کو عوامی سطح پر مکمل طور پر تنہا کر دیا ہے، اور اب مقامی آبادی اپنی حکومت اور سیکیورٹی اداروں کے شانہ بشانہ کھڑی ہو کر ان سفاک لٹیروں کے خلاف نبردآزما ہے۔
