وفاقی وزیرِ خزانہ محمد اورنگزیب نے اعلان کیا ہے کہ سعودی عرب نے پاکستان کے لیے 3 ارب ڈالر کے نئے اضافی ڈپازٹس فراہم کرنے کا عہد کیا ہے، جس کی رقم آئندہ ہفتے موصول ہونے کی توقع ہے۔ اس کے ساتھ ہی موجودہ 5 ارب ڈالر کے سعودی ڈپازٹس کو بھی اب سالانہ کے بجائے طویل مدت کے لیے رول اوور کیا جائے گا۔
واشنگٹن ڈی سی میں عالمی بینک اور (آئی ایم ایف) کے اسپرنگ اجلاس 2026 کے موقع پر میڈیا سے گفتگو کرتے ہوئے وزیرِ خزانہ نے بتایا کہ ان کی سعودی ہم منصب محمد بن عبداللہ الجدعان سے انتہائی تعمیری ملاقات ہوئی ہے۔ انہوں نے واضح کیا کہ سعودی عرب کی جانب سے یہ مالیاتی پیکج ایک ایسے وقت میں سامنے آیا ہے جب پاکستان کو بیرونی ادائیگیوں کے لیے مستحکم وسائل کی ضرورت ہے، جس سے نہ صرف زرمبادلہ کے ذخائر بہتر ہوں گے بلکہ بیرونی کھاتہ بھی مضبوط ہوگا۔
ادائیگیوں کی ترتیب
محمد اورنگزیب نے حکومتی عزم کا اعادہ کرتے ہوئے کہا کہ آئی ایم ایف پروگرام کے اہداف کے مطابق رواں مالی سال کے اختتام تک زرمبادلہ کے ذخائر کو 18 ارب ڈالر تک لے جایا جائے گا، جو تقریباً 3.3 ماہ کی درآمدات کے لیے کافی ہوں گے۔ انہوں نے گزشتہ ہفتے 1.4 ارب ڈالر کے یورو بانڈ کی کامیاب واپسی کا ذکر کرتے ہوئے اطمینان ظاہر کیا کہ حکومت تمام بیرونی واجبات کی بروقت ادائیگی کے لیے مکمل طور پر تیار ہے اور اس حوالے سے کسی تشویش کی ضرورت نہیں۔
مستقبل کی حکمتِ عملی
وزیرِ خزانہ نے سعودی قیادت، بالخصوص ولی عہد محمد بن سلمان کا شکریہ ادا کرتے ہوئے کہا کہ اس وقت عالمی سطح پر پاکستان کے بارے میں مثبت تاثر ابھر رہا ہے۔ عالمی بینک، آئی ایم ایف اور بین الاقوامی سرمایہ کار پاکستان کی معاشی اصلاحات اور حالیہ سفارتی کردار کو سراہ رہے ہیں۔ انہوں نے مزید بتایا کہ حکومت مالی وسائل کو متنوع بنانے کے لیے ‘پانڈا بانڈ’ کے اجرا اور ‘گلوبل میڈیم ٹرم نوٹ’ پروگرام پر بھی تیزی سے کام کر رہی ہے تاکہ معاشی استحکام کے تسلسل کو یقینی بنایا جا سکے۔