ایرانی وزیرِ خارجہ عباس عراقچی ایک اعلیٰ سطح کے وفد کے ہمراہ آج اسلام آباد پہنچ گئے ہیں۔ دفترِ خارجہ کے ترجمان کی جانب سے جاری کردہ بیان کے مطابق، آمد پر نائب وزیراعظم و وزیرِ خارجہ سینیٹر محمد اسحاق ڈار اور چیف آف آرمی اسٹاف و چیف آف ڈیفنس فورسز فیلڈ مارشل عاصم منیر نے دیگر اعلیٰ حکام کے ہمراہ معزز مہمان کا پرتپاک استقبال کیا۔
اپنے اس اہم دورے کے دوران ایرانی وزیرِ خارجہ پاکستان کی اعلیٰ قیادت سے ملاقاتیں کریں گے۔ ان ملاقاتوں کا بنیادی مقصد خطے کی تازہ ترین صورتحال پر تبادلہ خیال کرنا اور علاقائی امن و استحکام کے لیے جاری کوششوں کو مزید بہتر بنانا ہے۔
سفارتی ذرائع کا کہنا ہے کہ یہ دورہ ایک ایسے وقت میں ہو رہا ہے جب خطے میں اہم سیاسی و سیکیورٹی تبدیلیاں رونما ہو رہی ہیں۔ پاکستانی قیادت اور ایرانی وفد کے درمیان ہونے والی ان بات چیت میں دوطرفہ تعلقات اور علاقائی سلامتی کے امور کو کلیدی اہمیت حاصل ہوگی۔
دیکھئیے:ایرانی وزیرِ خارجہ عباس عراقچی کی آج رات اسلام آباد آمد متوقع، حکومتی ذرائع نے تصدیق کر دی