اسلام آباد: پاکستان سپر لیگ کے مداحوں کے لیے بڑی خوشخبری سامنے آئی ہے۔ وزیراعظم شہباز شریف نے پی ایس ایل 11 کے فائنل کے بعد اب تمام تینوں پلے آف میچز کے لیے بھی تماشائیوں کو اسٹیڈیم میں داخلے کی باقاعدہ اجازت دے دی ہے۔ یہ اہم فیصلہ چیئرمین پی سی بی محسن نقوی کی وزیراعظم سے ہونے والی حالیہ ملاقات میں کیا گیا۔
سوشل میڈیا پلیٹ فارم ‘ایکس’ پر اپنے پیغام میں محسن نقوی نے تصدیق کی کہ انہوں نے وزیراعظم سے پلے آف میچز میں عوامی شرکت کی منظوری حاصل کر لی ہے۔ تاہم، وزیراعظم نے اس اجازت کے ساتھ ایک اہم شرط بھی عائد کی ہے۔ ملک میں جاری “قومی کفایت شعاری مہم” کے پیشِ نظر، وزیراعظم نے شائقینِ کرکٹ سے پرزور اپیل کی ہے کہ وہ اسٹیڈیم آنے کے لیے پبلک ٹرانسپورٹ کا استعمال کریں اور ایندھن کے استعمال کو کم سے کم رکھیں تاکہ قومی وسائل کی بچت ممکن ہو سکے۔
محسن نقوی کا کہنا تھا کہ وزیراعظم نے پلے آف مرحلے میں پہنچنے والی چاروں ٹیموں کے لیے اپنی نیک تمناؤں کا اظہار بھی کیا ہے۔ یاد رہے کہ اس سے قبل تماشائیوں کو صرف فائنل کے لیے اجازت دی گئی تھی، جس پر شائقینِ کرکٹ کی جانب سے پلے آف میچز کو بھی “اوپن” کرنے کا پرزور مطالبہ کیا جا رہا تھا۔ اب اس فیصلے کے بعد کوالیفائر اور ایلیمینیٹرز کے دوران بھی اسٹیڈیم میں شائقین کا جوش و خروش دیکھنے کو ملے گا، جو لیگ کی کامیابی اور رونق میں اضافے کا باعث بنے گا۔
