ممبئی: بھارتی اداکارہ ریم شیخ کا کہنا ہے کہ وہ کسی غیر مسلم کے ساتھ زندگی نہیں گزار سکتیں کیونکہ وہ ایک مذہبی شخصیت ہیں۔
بھارتی میڈیا کے مطابق اداکارہ نے ایک انٹرویو میں بین المذاہب تعلقات کے حوالے سے اپنے خیالات کا اظہار کیا۔ انٹرویو کے دوران میزبان نے ان سے سوال کیا کہ اگر انہیں کسی دوسرے مذہب سے تعلق رکھنے والے شخص سے محبت ہو جائے تو کیا صورتحال ہوگی؟
اس سوال کا جواب دیتے ہوئے ریم شیخ نے واضح کیا کہ وہ ایسا نہیں کر سکتیں کیونکہ وہ باقاعدگی سے پانچ وقت کی نماز پڑھتی ہیں اور انہوں نے روزے بھی رکھنا شروع کر دیے ہیں۔ اداکارہ نے بتایا کہ ان کے گھر کا ماحول مختلف ہے جہاں ان کی والدہ ہندو اور والد مسلمان ہیں، لیکن وہ خود اپنے مذہب کی پابندی کرتی ہیں۔
شادی اور محبت کے موضوع پر بات کرتے ہوئے اداکارہ کا مزید کہنا تھا کہ انہوں نے اپنے خاندان میں طلاق کے واقعات دیکھے ہیں اور رشتوں کو ٹوٹتے ہوئے دیکھا ہے، جس کی وجہ سے وہ محبت پر مکمل یقین نہیں رکھتیں۔ البتہ انہوں نے یہ بھی کہا کہ خدا سے تعلق جوڑنے کے لیے محبت کا ہونا ضروری ہے تاکہ انسان اپنے اردگرد کے لوگوں سے اچھا رشتہ قائم کر سکے۔
دیکھئیے:کامیڈین جمی کمل میلانیا ٹرمپ کو متوقع بیوہ قرار دینے کے بعد مشکلات کا شکار
