واشنگٹن: معروف مزاحیہ فنکار جمی کمل کو خاتونِ اول میلانیا ٹرمپ کے بارے میں طنز کرنا مہنگا پڑ گیا ہے جس کے بعد صورتحال کافی کشیدہ ہو گئی ہے۔
غیر ملکی میڈیا رپورٹس کے مطابق جمی کمل نے خاتونِ اول کو مذاق میں متوقع بیوہ کہا تھا، جس پر امریکی صدر ڈونلڈ ٹرمپ اور میلانیا ٹرمپ شدید ناراض ہو گئے ہیں۔ اس بیان پر ایوانِ صدر کی جانب سے جمی کمل کی برطرفی کا مطالبہ کیا گیا ہے۔
اس معاملے کے بعد ڈزنی کے ٹیلی ویژن لائسنس بھی خطرے میں پڑ گئے ہیں جبکہ امریکی نشریاتی کمیشن نے ڈزنی کے خلاف تحقیقات کا آغاز بھی کر دیا ہے۔ تاہم، ڈزنی نے متعلقہ کمیشن کو قانونی جواب دینے کا فیصلہ کیا ہے۔
جمی کمل نے اپنے بیان کی وضاحت کرتے ہوئے کہا ہے کہ ان کا یہ تبصرہ صدر اور ان کی اہلیہ کے درمیان تئیس سالہ عمر کے فرق کے حوالے سے ایک ہلکا پھلکا مذاق تھا۔
دوسری جانب، معروف اداکار جارج کلونی بھی جمی کمل کے دفاع میں میدان میں آ گئے ہیں اور ان کا کہنا ہے کہ جمی ایک مزاحیہ فنکار ہے اور اس کے مذاق پر اس قسم کی بیان بازی انتہائی خطرناک ہے۔