پاک افغان سرحدی پٹی پر کشیدگی کے دوران پاکستانی سیکورٹی فورسز نے ژوب سیکٹر کے مدمقابل افغانستان کے اندر ایک اہم تزویراتی کامیابی حاصل کرتے ہوئے 32 مربع کلومیٹر رقبے پر مشتمل ‘گڈوانہ انکلیو’ کا مکمل کنٹرول حاصل کر لیا ہے۔ آئی ایس پی آر نے اس حوالے سے تازہ ترین فوٹیج جاری کی ہے جس میں انسپکٹر جنرل فرنٹیئر کور (آئی جی ایف سی) بلوچستان نارتھ، میجر جنرل محمد عاطف مجتبیٰ کو مذکورہ علاقے کا دورہ کرتے ہوئے دیکھا جا سکتا ہے۔
ذرائع کے مطابق یہ کارروائی افغان طالبان (ٹی ٹی اے) کی جانب سے پاکستانی چوکیوں پر بلا اشتعال فائرنگ اور دراندازی کی کوششوں کے جواب میں کی گئی۔ پاکستانی فورسز نے ‘محدود تزویراتی ایکشن’ کے دوران سرحد پار کر کے ٹی ٹی اے کی ‘طاہر پوسٹ’ سمیت ملحقہ اہم مقامات کا قبضہ حاصل کر لیا، جس کے بعد افغان جنگجوؤں کے پسپا ہونے کی اطلاعات موصول ہوئی ہیں۔
سوشل میڈیا پر وائرل ہونے والی فوٹیج میں میجر جنرل عاطف مجتبیٰ کو مفتوحہ علاقے میں سیکورٹی انتظامات کا جائزہ لیتے اور نوجوانوں کا حوصلہ بڑھاتے دیکھا جا سکتا ہے۔ دفاعی تجزیہ کاروں کے مطابق 32 مربع کلومیٹر افغان علاقے سے محرومی کابل انتظامیہ کے لیے بین الاقوامی سطح پر ایک بڑی سبکی تصور کی جا رہی ہے، کیونکہ اس سے قبل افغانستان نے اس علاقے میں کسی بھی قسم کی پیش قدمی کی تردید کی تھی۔
رپورٹس کے مطابق پاکستانی فورسز نے اب اس علاقے میں باقاعدہ باڑ لگانے اور نئی حفاظتی چوکیاں قائم کرنے کا عمل شروع کر دیا ہے تاکہ مستقبل میں دہشت گردوں کی دراندازی کو روکا جا سکے۔ اس پیش رفت کو سرحد پار سے ہونے والی دہشت گردی کے خلاف پاکستان کی ‘زیرو ٹالرینس’ پالیسی کے طور پر دیکھا جا رہا ہے۔ اب تک کابل کی جانب سے اس علاقائی نقصان پر کوئی باضابطہ ردعمل سامنے نہیں آیا ہے۔