دبئی: انٹرنیشنل کرکٹ کونسل نے سالانہ ٹی ٹوئنٹی ٹیم رینکنگ جاری کر دی ہے جس کے مطابق مردوں اور خواتین کی رینکنگ کے ٹاپ 10 میں کوئی بڑی تبدیلی سامنے نہیں آئی۔
سالانہ ٹی ٹوئنٹی رینکنگ میں ابتدائی سات ٹیموں نے اپنی پوزیشنیں برقرار رکھی ہیں۔ ورلڈ چیمپئن بھارت کی پہلی پوزیشن بدستور قائم ہے، تاہم ان کی سالانہ رینکنگ پوائنٹس میں ایک پوائنٹ کی کمی واقع ہوئی ہے۔ انگلینڈ کی ٹیم دوسرے، آسٹریلیا تیسرے اور نیوزی لینڈ چوتھے نمبر پر موجود ہے۔ اس کے علاوہ جنوبی افریقا کا پانچواں، پاکستان کا چھٹا اور ویسٹ انڈیز کا ساتواں نمبر بھی برقرار ہے۔
رینکنگ میں تبدیلی آٹھویں اور نویں نمبر پر دیکھنے میں آئی ہے جہاں سری لنکا کی ٹیم کو 6 پوائنٹس کا نقصان اٹھانا پڑا ہے اور وہ آٹھویں سے نویں نمبر پر چلی گئی ہے۔ دوسری جانب بنگلادیش کی ٹیم کو ایک پوائنٹ کا فائدہ ہوا ہے اور وہ آٹھویں نمبر پر آ گئی ہے۔ اس کے علاوہ افغانستان کا دسواں، زمبابوے کا گیارہواں اور آئرلینڈ کا بارہواں نمبر بدستور برقرار ہے۔
دوسری جانب آئی سی سی ویمنز ٹی ٹوئنٹی سالانہ ٹیم رینکنگ کی ابتدائی دس پوزیشنز میں بھی کوئی تبدیلی نہیں دیکھی گئی۔ آسٹریلیا کی خواتین ٹیم کا عالمی رینکنگ میں پہلا نمبر بدستور برقرار ہے۔ انگلینڈ دوسرے، بھارت تیسرے، نیوزی لینڈ چوتھے اور جنوبی افریقا پانچویں نمبر پر موجود ہیں۔ اس کے علاوہ ویسٹ انڈیز کا چھٹا، سری لنکا کا ساتواں اور پاکستان کا آٹھواں نمبر اپنی جگہ قائم ہے۔
دیکھئیے:پشاور زلمی نے فائنل میں حیدرآباد کنگزمین کو شکست دے کر پی ایس ایل 11 کا ٹائٹل اپنے نام کر لیا