جنت مرزا کو اپنی فلم میں لینا تباہی کے سوا کچھ نہیں تھا: سید نور

لاہور: معروف فلم ڈائریکٹر اور پروڈیوسر سید نور نے ٹک ٹاکر جنت مرزا کو اپنی فلم میں کاسٹ کرنے کے تجربے کو تباہ کن قرار دیتے ہوئے کہا ہے کہ اس فیصلے سے انہیں نقصان کا سامنا کرنا پڑا۔

حال ہی میں سید نور کے ایک انٹرویو کا کلپ سوشل میڈیا پر وائرل ہو رہا ہے، جس میں ان سے سوال کیا گیا کہ سوشل میڈیا پر مشہور ہونے والی شخصیات کو فالوورز کی بنیاد پر فلموں میں کاسٹ کرنے کا تجربہ کیسا رہا۔ اس کے جواب میں سید نور نے اپنے تجربے کا ذکر کرتے ہوئے کہا کہ جنت مرزا کو اپنی فلم میں لینا تباہی کے سوا کچھ نہیں تھا، کیونکہ فلم اتنی محنت سے بنائی گئی تھی لیکن لوگ اسے دیکھنے سنیما گھروں میں آئے ہی نہیں۔

ہدایتکار نے وضاحت کرتے ہوئے کہا کہ شائقین کا یہ نظریہ بن گیا تھا کہ جب انہیں اداکارہ سوشل میڈیا پر باآسانی دیکھنے کو مل جاتی ہیں تو وہ سنیما جا کر فلم دیکھنے کی زحمت کیوں کریں۔ اس سوچ نے فلم کی کامیابی پر براہ راست منفی اثر ڈالا۔

سید نور نے فلم بینوں کی بدلتی ہوئی ترجیحات کا ذکر کرتے ہوئے کہا کہ ماضی میں بننے والی فلموں کی اپنی مخصوص آڈینس ہوا کرتی تھی۔ لوگ انتظار کرتے تھے کہ فلاں اداکار کی فلم آئے گی تو وہ اسے دیکھنے جائیں گے، لیکن اب وہ دور بدل چکا ہے اور شائقین میں فلموں کے لیے وہ پرانا رجحان اور کشش باقی نہیں رہی۔

دیکھئیے:کپل شرما کا ’ورلڈ لافٹر ڈے‘ پر پاکستانی لیجنڈری کامیڈین امان اللّٰہ خان کو خراجِ تحسین