بھارتی کامیڈین اور اداکار کپل شرما نے ’ورلڈ لافٹر ڈے‘ کے موقع پر پاکستان کے لیجنڈری کامیڈین اور قہقہوں کے بادشاہ مرحوم امان اللّٰہ خان کو شاندار الفاظ میں خراجِ عقیدت پیش کیا ہے۔
کپل شرما نے اپنے ورلڈ لافٹر ڈے اسپیشل شو کے دوران اسٹینڈ اپ کامیڈین سمے رائنا اور یوٹیوبر رنویر الہٰ آبادیہ کا انٹرویو کرتے ہوئے پاکستانی فنکار کی خدمات کو یاد کیا۔ شو کے دوران کپل شرما نے امان اللّٰہ خان کے ساتھ اپنی ملاقات اور ان کی کہی ہوئی باتوں کو مداحوں کے ساتھ شیئر کیا۔
کپل شرما کا کہنا تھا کہ ایک ملاقات کے دوران لیجنڈری امان اللّٰہ خان نے انہیں بتایا تھا کہ شوبز انڈسٹری میں مقابلہ عام طور پر ہیرو اور ہیروئن کے درمیان ہوتا ہے۔ امان اللّٰہ خان کا مزید کہنا تھا کہ ہم کامیڈین تو بہت بڑا کام کر رہے ہیں اور سب کے چہروں پر مسکراہٹیں لاتے ہیں، ہمیں ہمیشہ اسی پر توجہ دینی چاہیے۔ انہوں نے کہا تھا کہ کسی کامیڈین کی اداکاری سے لوگوں کو تھوڑی زیادہ ہنسی آ جاتی ہے جبکہ کسی کی کامیڈی پر تھوڑی کم، لیکن مسکراہٹیں پھیلانے کا کام ہر لحاظ سے بہت عمدہ ہے۔
کپل شرما کی جانب سے امان اللّٰہ خان کو یاد کرنے اور خراجِ عقیدت پیش کرنے کی یہ ویڈیو سوشل میڈیا پر تیزی سے وائرل ہو رہی ہے، جسے صارفین کی جانب سے بے حد پسند کیا جا رہا ہے اور دونوں ممالک کے مداحوں کی جانب سے اسے سراہا جا رہا ہے۔
واضح رہے کہ قہقہوں کے بادشاہ کہلائے جانے والے امان اللّٰہ خان طویل علالت کے بعد 2020ء میں خالقِ حقیقی سے جا ملے تھے، لیکن ان کا فن آج بھی دونوں ممالک کے فنکاروں کے دلوں میں زندہ ہے۔
دیکھئیے:بھارتی اداکارہ ریم شیخ نے کسی غیرمسلم سے شادی نہ کرنے کا اعلان کر دیا
