بنوں: خیبر پختونخوا کے ضلع بنوں میں شدت پسندوں نے بارود سے بھری گاڑی پولیس چوکی سے ٹکرا دی، جس کے نتیجے میں 12 پولیس اہلکار شہید اور متعدد زخمی ہو گئے ہیں۔ ریجنل پولیس آفیسر (آر پی او) بنوں سجاد خان کے دفتر سے جاری بیان کے مطابق، یہ حملہ فتح خیل چوکی پر کیا گیا جہاں دھماکے کی شدت سے چوکی کی عمارت مکمل طور پر منہدم ہو گئی۔
پولیس حکام نے تصدیق کی ہے کہ ملبے تلے دبے اہلکاروں کو نکالنے کے لیے فوری ریسکیو آپریشن شروع کیا گیا، جس کے دوران 12 اہلکاروں کی لاشیں نکال لی گئیں جبکہ 3 اہلکاروں کو زندہ سلامت نکال کر ہسپتال منتقل کر دیا گیا ہے۔ دھماکے کے فوری بعد سیکیورٹی فورسز نے علاقے کو گھیرے میں لے لیا اور سرچ آپریشن کا آغاز کر دیا گیا ہے۔
رپورٹس کے مطابق، حملے کے وقت چوکی میں 15 اہلکار ڈیوٹی پر موجود تھے۔ عینی شاہدین اور پولیس ذرائع کا کہنا ہے کہ شدت پسندوں نے بارودی مواد سے لیس گاڑی کو براہِ راست عمارت سے ٹکرایا، جس سے عمارت لمحوں میں ملبے کا ڈھیر بن گئی۔ شہید اور زخمی اہلکاروں کو فوری طور پر بنوں کے ڈسٹرکٹ ہیڈ کوارٹر ہسپتال منتقل کیا گیا جہاں زخمیوں کو طبی امداد فراہم کی جا رہی ہے۔
دیکھئیے:بنوں میں فتح خیل پولیس چوکی پر خودکش حملہ، فائرنگ کا تبادلہ جاری