واشنگٹن: امریکی صدر ڈونلڈ ٹرمپ نے ایک سنسنی خیز انکشاف کرتے ہوئے کہا ہے کہ امریکہ نے ایران کے ساتھ جنگ بندی صرف اور صرف پاکستان کی خاطر اور اس کے احترام میں قبول کی ہے۔ چین کے کامیاب سرکاری دورے سے واپسی پر صدارتی طیارے ‘ایئرفورس ون’ میں سوار صحافیوں سے غیر رسمی گفتگو کرتے ہوئے انہوں نے مشرقِ وسطیٰ کی حالیہ صورتحال اور سفارتی کوششوں پر کھل کر بات کی۔
صدر ڈونلڈ ٹرمپ نے واضح الفاظ میں اعتراف کیا کہ وہ ذاتی طور پر ایران کے ساتھ اس جنگ بندی کے حق میں بالکل نہیں تھے، لیکن پاکستان کی جانب سے کی جانے والی مخلصانہ سفارتی کوششوں اور ثالثی کے باعث انہوں نے اس فیصلے کی توثیق کی۔ ان کا کہنا تھا کہ ہم نے یہ بڑا قدم پاکستان کے ساتھ اپنے مضبوط تعلقات اور اس کی درخواست کا مان رکھنے کے لیے اٹھایا ہے۔
گفتگو کے دوران امریکی صدر نے پاکستان کی قیادت اور عوام کی کھل کر تعریف کی۔ انہوں نے پاکستانی عوام اور وہاں کی قیادت کو شاندار الفاظ میں خراجِ تحسین پیش کرتے ہوئے کہا کہ وہ انتہائی بہترین اور زبردست لوگ ہیں، بالخصوص وہاں کے فیلڈ مارشل اور وزیرِ اعظم نے اس پورے عمل میں انتہائی اہم کردار ادا کیا ہے۔