فیلڈ مارشل کا کوئٹہ گیریژن کا دورہ، آپریشنل تیاریوں اور جدید جنگی تقاضوں پر زور

چیف آف ڈیفنس فورسز فیلڈ مارشل عاصم منیر نے کہا ہے کہ پراکسیز اور منفی پراپیگنڈے کے ذریعے پاکستان کی ترقی و خوشحالی کو سبوتاژ کرنے کی کوشش کرنے والی تمام دشمن قوتیں اپنے ناپاک عزائم میں مکرر ناکام ہوں گی۔ بلوچستان میں امن، استحکام اور ریاستی رٹ برقرار رکھنے کے لیے سیکیورٹی فورسز کی خدمات اور آپریشنل عزم کو ہمیشہ برقرار رکھا جائے گا۔

آئی ایس پی آر کی جانب سے جاری کردہ اعلامیے کے مطابق چیف آف ڈیفنس فورسز فیلڈ مارشل سید عاصم منیر نے کوئٹہ گیریژن کا اہم دورہ کیا۔ کوئٹہ آمد پر کور کمانڈر کوئٹہ نے فیلڈ مارشل کا پُرتپاک استقبال کیا اور انہیں فارمیشن کی آپریشنل تیاریوں پر بریفنگ دی۔

اپنے دورے کے دوران فیلڈ مارشل سید عاصم منیر نے کمانڈ اینڈ اسٹاف کالج، کوئٹہ کا دورہ کیا، جہاں انہوں نے زیرِ تربیت افسران اور فیکلٹی ممبران سے تفصیلی خطاب کیا۔ انہوں نے اسٹاف کالج کے اعلیٰ تربیتی معیار، تدریسی استعداد اور پیشہ ورانہ مہارت کو زبردست الفاظ میں سراہا۔ فیلڈ مارشل نے بدلتے ہوئے عالمی منظرنامے میں ابھرتی ہوئی جدید ٹیکنالوجیز، ملٹی ڈومین آپریشنز اور مستقبل کے جنگی چیلنجز سے ہم آہنگ رہنے کی ضرورت پر زور دیا۔ انہوں نے تینوں مسلح افواج کے مابین باہمی ہم آہنگی کو مزید مضبوط بنانے کی اہمیت کا بھی احاطہ کیا اور جدید جنگ کے تیزی سے بدلتے ہوئے کردار پر روشنی ڈالی۔

چیف آف ڈیفنس فورسز نے دورانِ خطاب واضح کیا کہ کمانڈ اینڈ اسٹاف کالج کے فارغ التحصیل افسران نے ہمیشہ اپنی غیر معمولی کارکردگی اور پیشہ ورانہ لگن کے باعث دفاعِ وطن میں نمایاں کردار ادا کیا ہے۔ انہوں نے زیرِ تربیت افسران کو ہدایت کی کہ وہ بدلتے ہوئے جنگی تقاضوں کا مؤثر جواب دینے کے لیے اپنی اور اپنے ماتحت جوانوں کی مسلسل تربیت کو یقینی بنائیں، اور پیشہ ورانہ مہارت، ہر وقت کی تیاری اور آپریشنل برتری کے اعلیٰ ترین معیار کو برقرار رکھیں۔

بعد ازاں فیلڈ مارشل نے بلوچستان میں تعینات مختلف فارمیشنز کے افسران اور جوانوں سے بھی ملاقات کی۔ انہوں نے صوبے میں امن و امان کے قیام، پائیدار استحکام اور ریاستی رٹ کو برقرار رکھنے کے لیے سیکیورٹی فورسز کے بلند حوصلے کی تعریف کی۔ چیف آف ڈیفنس فورسز نے وطن عزیز کے دفاع اور اندرونی سیکیورٹی کے چیلنجز سے نمٹنے کے لیے جوانوں کی آپریشنل تیاریوں اور لازوال پیشہ ورانہ عزم کو زبردست خراجِ تحسین پیش کیا۔

دیکھیے: شمالی وزیرستان میں سکیورٹی فورسز کا کامیاب آپریشن، 18 خوارج جہنم واصل