افغانستان کے جنوبی صوبے ہلمند میں نامعلوم مسلح افراد کی فائرنگ کے نتیجے میں پاکستان میں دہشت گردی کی متعدد کارروائیوں میں مطلوب، کالعدم بلوچستان لبریشن آرمی (بی ایل اے) کا انتہائی اہم اور سینیئر ترین کمانڈر محی الدین بلوچ ہلاک ہو گیا ہے۔ ذرائع کے مطابق اس واقعے کو بلوچستان میں سرگرم دہشت گرد گروپ کے لیے ایک بہت بڑا دھچکا قرار دیا جا رہا ہے۔
ذرائع ابلاغ کی رپورٹس کے مطابق، افغان صوبے ہلمند میں روپوش کالعدم تنظیم کے سینیئر کمانڈر محی الدین بلوچ پر نامعلوم مسلح افراد نے اس وقت اندھا دھند فائرنگ کی جب وہ ایک خفیہ ٹھکانے کے قریب موجود تھا، فائرنگ کے نتیجے میں وہ موقع پر ہی ہلاک ہو گیا۔ حملے کے بعد مسلح افراد جائے وقوعہ سے فرار ہونے میں کامیاب ہو گئے۔
سیکیورٹی ماہرین اور ذرائع کا کہنا ہے کہ محی الدین بلوچ کالعدم بی ایل اے کے نیٹ ورک کو چلانے اور پاکستان کے صوبہ بلوچستان میں سیکیورٹی فورسز اور قومی تنصیبات پر حملوں کی منصوبہ بندی میں کلیدی کردار ادا کر رہا تھا۔
افغانستان میں اس کی ہلاکت سے مذکورہ دہشت گرد تنظیم کے نیٹ ورک کو شدید نقصان پہنچا ہے۔ تاحال کسی گروپ نے اس حملے کی ذمہ داری قبول نہیں کی ہے۔