عالمی سفارتی منظرنامے پر پاکستان نے ایک بار پھر اپنی تزویراتی اہمیت کا لوہا منوا لیا ہے۔ پاکستان کی انتھک اور کامیاب سفارتی کوششوں کے نتیجے میں امریکا اور ایران کے درمیان پچھلے 110 روز سے جاری شدید کشیدگی اور تنازع کا باقاعدہ خاتمہ ہو گیا ہے۔ دونوں ممالک نے خطے میں امن و امان کی بحالی کے لیے تاریخی سفارتی دستاویز اسلام آباد مفاہمتی یادداشت پر دستخط کر دیے ہیں، جس کے بعد یہ معاہدہ فوری طور پر نافذ العمل ہو چکا ہے۔
وزیرِ اعظم آفس سے جاری کردہ باقاعدہ اعلامیے اور ایکس پر جاری کردہ سرکاری بیان کے مطابق وزیراعظم محمد شہباز شریف نے اسلام آباد مفاہمتی یادداشت پر بطور ثالث اور ضامن اپنے دستخط ثبت کر دیے ہیں۔
اس تاریخی دستاویز پر امریکی صدر ڈونلڈ ٹرمپ اور ایران کے صدر مسعود پزشکیان کے دستخط پہلے ہی موجود تھے۔ اس معاہدے کو خطے اور عالمی سطح پر پاکستان کی ایک بہت بڑی سفارتی کامیابی قرار دیا جا رہا ہے جس سے مشرقِ وسطیٰ سمیت دنیا بھر میں امن کی نئی راہ ہموار ہوگی۔
مفاہمتی یادداشت کی تفصیلات کے مطابق امریکہ اور ایران نے طے شدہ وقت سے پہلے ہی اس اہم ترین دستاویز پر دستخط کیے۔ اس معاہدے کے تحت دونوں ممالک کے درمیان جنگی صورتحال کا خاتمہ ہوگا اور اہم ترین تجارتی آبی گزرگاہ آبنائے ہرمز کو دوبارہ کھول دیا جائے گا۔
سفارتی ذرائع کے مطابق امریکی صدر ڈونلڈ ٹرمپ نے فرانسیسی صدر ایمانوئل میکرون کی موجودگی میں اس یادداشت پر دستخط کیے، جبکہ دوسری جانب ایرانی سرکاری میڈیا نے بھی صدر مسعود پزشکیان کی دستخط کرتے ہوئے تصاویر جاری کر دی ہیں۔
وزیراعظم محمد شہباز شریف نے ایکس پر اپنے پیغام میں اس اہم سنگِ میل کی تصدیق کرتے ہوئے کہا کہ یہ تاریخی پیش رفت دونوں ممالک کے درمیان طویل تنازع کے سفارتی حل کے پختہ عزم کا مظہر ہے۔
انہوں نے اس امید کا اظہار کیا کہ یہ معاہدہ خطے میں استحکام لانے میں کلیدی کردار ادا کرے گا۔ واضح رہے کہ اس اہم ترین سفارتی مشن کی کامیابی کے فوراً بعد وزیراعظم شہباز شریف کچھ دیر میں سوئٹزرلینڈ کے لیے روانہ ہو رہے ہیں۔
دیکھیے: پاکستان کی ثالثی میں امریکہ اور ایران کے تاریخی معاہدے پر دستخط، آبنائے ہرمز کھولنے کا فیصلہ