وزیراعظم محمد شہباز شریف نے سعودی عرب کے ولی عہد اور وزیراعظم شہزادہ محمد بن سلمان بن عبدالعزیز آل سعود سے ٹیلی فون پر گفتگو کی ہے۔ اس موقع پر انہوں نے بحیرہ احمر میں سعودی آئل ٹینکروں پر حوثی ملیشیا کے حملوں کی شدید الفاظ میں مذمت کرتے ہوئے مملکت کے ساتھ پاکستان کی مکمل یکجہتی کا اعادہ کیا۔
وزیراعظم آفس کے مطابق گفتگو کے دوران شہباز شریف نے واضح کیا کہ سعودی آئل ٹینکروں پر حملے بین الاقوامی قانون کی کھلی خلاف ورزی ہیں۔ انہوں نے کہا کہ یہ کارروائیاں عالمی تجارتی نقل و حمل، جہاز رانی اور خطے کے امن و استحکام کے لیے شدید خطرہ ہیں۔
شہباز شریف نے یقین دہانی کروائی کہ فیلڈ مارشل سید عاصم منیر اور پوری پاکستانی قوم اس نازک مرحلے پر سعودی قیادت اور عوام کے ساتھ کھڑی ہے۔ انہوں نے مملکتِ سعودی عرب کی سلامتی، خودمختاری اور علاقائی سالمیت کے لیے پاکستان کے غیر متزلزل عزم کا اعادہ کیا۔
وزیراعظم نے مزید کہا کہ پاکستان بحیرہ احمر، آبنائے ہرمز اور خطے میں سمندری تجارتی راستوں کی بلا تعطل روانی اور امن قائم رکھنے کے لیے سعودی عرب اور عالمی برادری کے ساتھ مکمل تعاون جاری رکھے گا۔
سعودی ولی عہد شہزادہ محمد بن سلمان نے اس مشکل وقت میں پاکستان کی مسلسل اور پختہ حمایت پر وزیراعظم کا شکریہ ادا کیا اور دونوں برادر ممالک کے تاریخی و مضبوط تعلقات کو سراہا۔ گفتگو کے اختتام پر وزیراعظم نے خادمِ حرمین شریفین شاہ سلمان بن عبدالعزیز آل سعود کے لیے خیرسگالی کے جذبات کا اظہار بھی کیا۔
دیکھیے: امریکہ ایران کشیدگی: پاکستان، قطر اور مصر کی 10 روزہ جنگ بندی کی بڑی سفارتی پیشکش
