پاکستان نے دفاعی ٹیکنالوجی کے شعبے میں اہم پیش رفت کرتے ہوئے فضا سے فضا میں مار کرنے والے اپنے پہلے مقامی ساختہ میزائل فاز کا کامیاب تجربہ کرلیا۔
(آئی ایس پی آر کے مطابق فاز میزائل جدید ٹرمینل گائیڈنس سسٹم سے لیس ہے۔ یہ طویل فاصلے پر موجود فضائی اہداف کو نشانہ بنانے کی صلاحیت رکھتا ہے۔
آئی ایس پی آر کا کہنا ہے کہ میزائل کی کامیاب آزمائش سے پاک فضائیہ کی آپریشنل صلاحیتوں میں اضافہ ہوگا۔ اس سے ملکی دفاعی صلاحیت اور فضائی دفاعی نظام بھی مزید مضبوط ہوں گے۔
ترجمان پاک فوج کے مطابق فاز میزائل کا تجربہ پاکستان کی دفاعی صنعت میں تکنیکی مہارت اور جدت کا مظہر ہے۔ اس کی تیاری میں مقامی سطح پر جدید دفاعی ٹیکنالوجی کے فروغ کو اہمیت دی گئی ہے۔
میزائل کے کامیاب فلائٹ ٹیسٹ کا مشاہدہ مسلح افواج کے سینئر افسران نے کیا۔ اس موقع پر میزائل کی تیاری میں کردار ادا کرنے والے سائنسدان اور انجینئرز بھی موجود تھے۔
صدر مملکت، وزیراعظم، چیف آف ڈیفنس فورسز اور مسلح افواج کے سربراہان نے کامیاب تجربے پر سائنسدانوں اور انجینئرز کو مبارکباد دی ہے۔
حکام نے اس کامیابی کو پاکستان کی قومی ایرو اسپیس اور دفاعی صلاحیتوں کے فروغ میں اہم سنگ میل قرار دیا ہے۔
