افغانستان فریڈم فرنٹ نے صوبہ بغلان کے ضلع دوشی میں طالبان کے عسکری قافلے پر راکٹ حملے کی ذمہ داری قبول کر لی۔ فریڈم فرنٹ کے مطابق ہفتہ 25 جولائی 2026 کو کابل سے بدخشان جانے والے اس قافلے کو سالنگ کے شمالی علاقے سے ہی ٹریک کیا جا رہا تھا۔
بیان کے مطابق حملے کے وقت یہ قافلہ بدخشاں میں جاری کشیدگی کے پیشِ نظر طالبان کی تازہ دم کمک اور عسکری سامان لے کر جا رہا تھا۔ فریڈم فرنٹ کا دعویٰ ہے کہ راکٹ حملے کے نتیجے میں 7 طالبان اہلکار ہلاک اور 6 شدید زخمی ہوئے، جبکہ آپریشن کے دوران فریڈم فرنٹ کا کوئی جنگجو زخمی نہیں ہوا۔
دوسری جانب پنجشیر سے بھی مزاحمتی کارروائیوں کی خبریں سامنے آ رہی ہیں، جہاں مقامی ذرائع کے مطابق طالبان مخالف جنگجو مختلف علاقوں میں سرگرم ہیں۔ اس طرح بدخشاں، بغلان اور پنجشیر سمیت متعدد صوبوں میں طالبان کے خلاف مزاحمتی کارروائیوں میں بیک وقت شدت دیکھی جا رہی ہے۔
سابق سی آئی اے اہلکار سارہ آدمز نے دعویٰ کیا ہے کہ بدخشان کے ضلع زیباک میں ہونے والی جھڑپوں کے دوران طالبان کو بھاری جانی نقصان اٹھانا پڑا۔
سارہ آدمز کے مطابق ان جھڑپوں میں تقریباً 20 طالبان جنگجو ہلاک ہوئے، جبکہ طالبان اپنے نقصانات کو عوام سے چھپا رہے ہیں۔
دیکھیے: بدخشاں میں فریڈم فرنٹ کا طالبان کے دو ڈرون مار گرانے کا دعویٰ
