افغانستان فریڈم فرنٹ نے دعویٰ کیا ہے کہ صوبہ بدخشان کے ضلع زیبک میں طالبان کے ساتھ جاری جھڑپوں کے دوران طالبان اپنی چوکیوں کے اطراف بارودی سرنگیں بچھا رہے ہیں اور بعض مورچے خالی کرنے کی تیاری کر رہے ہیں۔
فریڈم فرنٹ کی جانب سے جاری بیان میں کہا گیا ہے کہ ضلع زیبک کے مرکز میں واقع طالبان کی متعدد چوکیوں کے گرد بارودی سرنگیں نصب کی جا رہی ہیں۔ بیان کے مطابق یہ اقدامات دفاعی حکمتِ عملی اور ممکنہ پسپائی کی تیاری کا حصہ ہیں، جبکہ فریڈم فرنٹ کے جنگجو مختلف محاذوں پر اپنی کارروائیاں جاری رکھے ہوئے ہیں۔
فریڈم فرنٹ کا کہنا ہے کہ حالیہ جھڑپوں کا آغاز گزشتہ جمعرات کو ہوا تھا، جس کے بعد ضلع زیبک اور اس کے گرد و نواح میں متعدد مقامات پر دونوں فریقوں کے درمیان لڑائی جاری ہے۔ تنظیم نے دعویٰ کیا کہ ان جھڑپوں میں طالبان کو بھاری جانی نقصان پہنچا ہے، تاہم اس حوالے سے کوئی حتمی اعداد و شمار جاری نہیں کیے گئے۔
بیان میں مزید کہا گیا ہے کہ طالبان کی جانب سے علاقے میں اپنی پوزیشنیں برقرار رکھنے کی کوششیں جاری ہیں، لیکن فریڈم فرنٹ کے مطابق مزاحمتی کارروائیوں کے باعث طالبان کو مسلسل دباؤ کا سامنا ہے۔
